Вардар и Малме во „второ полувреме“ од квалификацискиот двомеч за Лигата на шампиони. По ремито (1:1) на „Сведбанк арена“ минатата недела, на ред се возвратните 90 минути од македонско-шведската пресметка што ќе го дадат ривалот на Копенхаген во третото коло. Мечот на стадионот „Младост“ во Струмица е денеска со почеток во 18 часот.
„Имаме добар резултат, имаме активен резултат од првиот меч, но далеку од тоа дека нè очекува полесна задача. Напротив. Овојпат ќе биде, можеби, уште потешко. Противникот сигурно ќе даде максимум за посакуван резултат, а ние треба со паметна и ангажирана игра и со концентрација во текот на сите 90 минути да покажеме дека оние 1:1 од Малме не беа случајни“, истакна Седлоски, тренер на Вардар, пред реваншот со Малме.
Седлоски не планира, речиси, никакви играчки промени во линиите во тимот за разлика од првиот натпревар. Од оние што ќе ги испрати на мегдан од првата минута очекува да остават срце на терен и максимална заложба да остварат резултат со кој ќе се задржат во фудбалска Европа, барем, уште половина месец.
„Сега, во секој случај, подобро го познаваме Малме по онаа прва средба. Се надевам дека грешките што се пројавија ќе бидат отстранети или во најмала рака сведени на минимум, дека ќе одиграме добар натпревар по кој публиката што ќе дојде во Струмица и јавноста воопшто ќе има причина за радост и задоволство. Добро работевме овие денови и можам да кажам дека фудбалерите се подготвени за предизвикот што ги очекува. Елиминација на Малме и пласман во третото коло во Лигата на шампиони се доволен мотив за нив“, додаде Седлоски.
Судиската тројка за натпреварот доаѓа од Украина. На центарот ќе биде Анатолиј Жабченко, а крај аут линиите ќе му асистираат Александар Војтјук и Серхиј Бекер.
Лига на шампиони/квалификации/2 коло/реванши
Денеска играат
Астана – Спартакс Јурмала (1:0)
Алашкерт – БАТЕ Борисов (1:1)
Вардар – Малме (1:1)
Самтредија – Карабаг (0:5)
ТНС – Риека (0:2)
Викингур – Хафнарфјордур (1:1)
Будуќност – Партизан (0:2)
Двојки за утре
Диделанж – АПОЕЛ (0:1)
Розенборг – Дандалк (1:1)
Копенхаген – Жилина (3:1)
Кукс – Шериф Тираспол (0:1)
Лудогорец – Жалгирис (1:2)
Марибор – Зрински (2:1)
Салцбург – Хибернијанс (3:0)
Селтик – Линколн (2:0)
Легија Варшава – Мариехам (3:0)
Хонвед – Хапоел Бер Шева (1:2)
Во загради се резултати од првите средби