Хелсинки и Динамо Минск се ривали на Шкендија, односно, Работнички во второто квалификациско коло за Лига Европа. И тетовци и дебармаалци, според ждрепката, се домаќини во првите средби на 13 јули.
Закажаниот термин сепак, може да претрпи промена од типот на поместување на еден од мечевите за ден или два порано или, пак, еден од двата тима најпрво да гостува за што, секако, е потребна согласност и од финскиот, т.е., белорускиот клуб.
Пред Хелсинки е второ гостување во Македонија во три години. Финците беа противник на Работнички во квалификациите за Лигата на шампиони во сезоната 2014/15. Ова лето повторно ќе долетаат на „Александар Велики“, но на мегдан со тетовските „црвено-црни“, откако ја елиминираа велшката екипа Конах во првото коло.
Истото важи и за Динамо Минск. Наредниот ривал на Работнички беше во Скопје во сезоната 2009/10 во пресметка со Ренова во квалификациите за Лига Европа.
И Хелсинки и Динамо Минск беа победници во споменатите дуели со македонските претставници.