Ако високите температури беа проблем за Хелсинки во Струмица, тогаш вештачката подлога на стадионот „Сонера“ би можела да претставува хендикеп за Шкендија. Тоа најдобро го знаат Баже Тодоровски и Штефан Вујчиќ, сега првотимци на тетовци, кои имаа прилика да ја почувствуваат при настапот за Работнички во летото во 2014 година.
Но, за разлика од дебармаалци, кои тогаш заминаа на реванш со 0:0 од Скопје, „црвено-црните“ имаат и тоа како голем адут во ракав за пласман во наредната рунда. Двата гола предност (3:1) од првиот меч на „Младост“ би требале да бидат доволни за македонскиот вицепрвак попладнево во финската престолнина за осигурување на место во третото коло во кое ќе одат на двомеч со подобриот меѓу Норчепинг и Тракаи. Швеѓаните имаат 2:1 пред денешното гостување во Литванија.
„Нашата денешна мисија е јасна. Овде сме за елиминација на Хелсинки и само на тоа сме фокусирани. Резултатот од првиот меч нема да нè залаже. Имаме два гола повеќе, но и ривал кој покажа голем потенцијал во Струмица. Ќе биде тешко меѓутоа сме подготвени за нова голема борба и, се надевам, продолжување во Лига Европа“, истакна Ферхан Хасани, капитен на Шкендија, во пресрет на реваншот со Хелсинки.
Големите, на хартија, 3:1 од Струмица нема да бидат причина за Ќатип Османи да менува и во играчкиот дел и во формацијата. Стратегот на тетовци најави дека двата гола позитива ќе се бранат со напаѓачки и отворен фудбал во Хелсинки што се надева дека ќе донесе и посакуван ефект.
„Шкендија не мина толкав пат да се брани. Дојдовме во Хелсинки да играме фудбал и да бидеме активен партнер на теренот. Тоа е нашата определба за потврда на резултатот од првиот меч. Поинаку и не знаеме“, нагласи Османи пред возвратните 90 минути со финскиот претставник.
Реваншот меѓу Хелсинки и Шкендија на „Сонера“, стадион што се наоѓа во непосредна близина на Олимпискиот во финската престолнина е со почеток од 18 часот. Правдата е доверена на судиска тројка од Исланд на чело со Гунар Јарл Јонсон и асистентите Биркир Сигурдарсон и Андри Вигфусон.