Поранешниот италијански селектор и тренер на Јувентус, Марчело Липи смета дека тимот од Торино има големи шанси да продолжи во полуфинале во Лигата на шампиони. Пред утрешниот реванш против Барселона на „Камп Ноу“ тој порача дека „старата дама“ има подобра екипа од Каталонците, па дури смета дека е можен триумф на „бјанконерите“ и во Шпанија. Образложи и зошто.
„Оружениот аренал на Барселона е уникатен, но само во напаѓачкиот дел. Јувентус е подобра екипа и ако успее да го неутрализира триото на Барса како што беше случај во првиот меч во Торино, тогаш имаат шанса да победат и во реваншот. Јуве ќе мора да игра на „Камп Ноу“ како што играше на својата арена. Барса ќе има 90.000 навивачи кои ѝ помогнаа против ПСЖ, но Јувентус не е ПСЖ“, изјави Липи.
Утревечер покрај Барселона и Јувентус ќе играат уште Монако и Борусија Дортмунд. Мечот меѓу францускиот и германскиот тим е на „Луј Втори“, екипата на Леонардо Жардим има 3:2 од „Сигнал Идуна парк“.