Дури седум екипи во Е – Х групниот сегмент во фудбалската Лига на шампиони осигураа осминафинале. Единствена непознаница по вечерашните дуели од претпоследното петто коло е кој ќе прави друштво на Манчестер сити во нокаут фазата од групата Ф за што ќе решаваат Шахтјор Доњецк и Олимпик Лион низ меѓусебен дуел во Украина.
Реал Мадрид во дербито славеше над Рома со 2:0. Стрелци за европскиот шампион на „Олимпико“ беа Бејл во 47. минута и Лукас во 59. минута. И двете екипи, сепак, ќе бидат меѓу 16. најдобри во УЕФА клупската елита со оглед на триумфот на Викторија Плзен над ЦСКА во Москва со 2:1 со пресврт во второто полувреме.
Најубедливата победа ја забележаа фудбалерите на Баерн Минхен кои на својата „Алијанц арена“ ја декласираа Бенфика со 5:1. Мрежата на Португалците по двапати ја тресеа Арјен Робен (13 минута, 30 минута) и Роберт Левандовски (36 минута, 51 минута), за „петарда“ се погрижи Франк Рибери во 76. минута. Почесниот за гостите од Лисабон беше дело на Жедсон Фернандеш во 46. минута.
Левандовски, покрај колективната причина за задоволство на Баварците со најновите три освоени бода, имаше и лична. Напаѓачот на репрезентацијата на Полска влезе во клубот на играчи со 50. погодоци во ЛШ во што од 77 натпревари. Останатите четворица се Руд ван Нистелрој (62 меча), Лионел Меси (66 меча), Кристијано Роналдо (92 меча) и Карим Бензема (95 меча).
Тимот на Ајакс е вториот осминафиналист од групата Е по триумфот над АЕК во Атина со 2:0. Двата гола за холандскиот претставник ги постигна Душан Тадиќ во 68. минута од пенал и во 72. минута по асистенција на Јан Клас Хунтелар.
Групата Х донесе два минимални триумфа (1:0) на домашните екипи. Јувентус со голот на Марио Манџукиќ во 59. минута ја порази Валенсија додека Манчестер јунајтед на „Олд Трафорд“ славеше над Јанг Бојс. Спасител на „црвените ѓаволи“ беше Маруан Фелаини чиј погодок во екстра времето на средбата беше причина за шоу прослава на менаџерот Жозе Мурињо.
Лига на шампиони
Резултати, 5 коло
Група Е
Баерн Минхен – Бенфика 5:1
АЕК – Ајакс 0:2
Табела: Баерн Минхен 13, Ајакс 11, Бенфика 4, АЕК 0.
Идно коло (12 декември): Ајакс – Баерн Минхен, Бенфика – АЕК.
Група Ф
Хофенхајм – Шахтјор Доњецк 2:3
Олимпик Лион – Манчестер сити 2:2
Табела: Манчестер сити 10, Олимпик Лион 7, Шахтјор Доњецк 5, Хофенхајм 3.
Идно коло (12 декември): Манчестер сити – Хофенхајм, Шахтјор Доњецк – Олимпик Лион.
Група Г
Рома – Реал Мадрид 0:2
ЦСКА Москва – Викторија Плзен 1:2
Табела: Реал Мадрид 12, Рома 9, Викторија Плзен 4, ЦСКА Москва 4.
Идно коло (12 декември): Реал Мадрид – ЦСКА Москва, Викторија Плзен – Рома.
Група Х
Манчестер јунајтед – Јанг Бојс 1:0
Јувентус – Валенсија 1:0
Табела: Јувентус 12, Манчестер јунајтед 10, Валенсија 5, Јанг Бојс 1.
Идно коло (12 декември): Јанг Бојс – Јувентус, Валенсија – Манчестер јунајтед.