Мартин Серафимов наместо Томислав Јагуриновски за позицијата десен бек и Димитар Димитриоски наместо Бојан Маџовски на позицијата лево крило. Ова се двете промени во составот на македонската ракометната репрезентација што ги направи селекторот Данило Брестовац за вечерашниот реванш против Исланд во Скопје во квалификациите за Европското првенство во 2020 година.
Две промени во ростерот направи и Гудмундур Гудмундсон. Исландската селекција допатува во Скопје со нови двајца голмани за разлика од мечот во средата во Рејкјавик. На Островот останаа Арон Едвардсон и Бјоргвин Густафсон, а место во авионот добија тинејџерот Виктор Гисли и Агуст Бјоргвинсон.
Македонија го порази Исланд во средата во Рејкјавик со 34:33 и го презеде водството на табелата во третата група, а со триумф вечерва ќе завери уште едно учество на ЕП во низа. Исландскиот селектор, пак, е убеден дека „црвено-жолтите“ не можат да одиграат два меча на високо ниво и смета дека неговите момчиња се кадарни да се одмаздат за првиот пораз на домашен терен по 13 години.
Но, она што е сигурно е пеколната атмосфера што ги чека Исланѓаните вечерва во салата „Борис Трајковски“. Билетите за мечот се распродадени од петокот, па навивачите ќе бидат осми соиграч на Кире Лазаров и компанија. Реваншот меѓу ракометните репрезентации на Македонија и на Исланд е од 20 часот.