Свечената седница за ратификација на Протоколот за пристапување на Македонија во НАТО ќе се одржи денеска во Собранието во присуство на претседатели и претставници на парламенти на земјите од соседството, на македонскиот државен и политички врв, на дипломатскиот кор. Со ратификацијата, земјата ја дели уште еден чекор до полноправното членство во Алијансата како 30. земја-членка. Ќе остане недовршена уште ратификацијата во Парламентот на Шпанија, а ратификацијата кај нас ќе има одложено дејство и ќе се активира откако процесот ќе заврши во Мадрид.
Пред почетокот на свечената седница, претседателот на Собранието Џафери ќе има кратки поздравни средби со претставниците на парламентите на соседните земји. Во Собранието на овој чин денеска ќе бидат присутни Мирослав Туѓман, пратеник и шеф на Хрватската делегација во ПС-НАТО, Василика Хуси, потпретседател на албанскиот Парламент, Цвета Карајанчева, претседател на бугарското Собрание, Генци Ниманбегу, претседател на Парламент на Црна Гора.
На седницата поканети да присуствуваат се и поранешни претседатели, премиери, лидерите на СДСМ, Зоран Заев и на ВМРО-ДПМНЕ, Христијан Мицкоски, како и претставници на дипломатскиот кор, меѓу кои и амбасадори од земји членки на НАТО. По ратификацијата, во 16 часот е планирана и церемонија на подигнување на знамето на НАТО пред Собранието.
Откако Северна Македонија и Грција го решија спорот за името, Договорот од Преспа беше ратификуван од македонскиот Парламент, поддршка добија и уставните измени, а потоа договореното беше ратификувано и од Грција. Земјава како што беше ветено, поканата за НАТО ја доби на самитот на 11 и 12 јули во 2018 година во Брисел, а на 6 февруари лани, амбасадорите на земјите-членки на НАТО, исто така, во Брисел го ставија својот потпис на Протоколот на пристапување во Алијансата.
За десет месеци Протоколот за пристапување во НАТО го ратификуваа 28 од вкупно 29 членки, се чека во Шпанија, каде Педро Санчез минатиот месец успеа да формира Влада на неговите социјалисти и левичарската партија Подемос.
Владата на Шпанија кон крајот на минатиот месец го одобри Протоколот за пристапување и го достави на усвојување во Параламентот при што побара ратификација на документот по итна постапка.
„Неопходно е ратификацијата да биде по итна постапка со цел да не се одложуваат заложбите на Шпанија како сојузник во НАТО за прием на Северна Македонија во Алијансата“, беше наведено во образложението на шпанската Влада.
Процедурата таму вообичаено трае шест месеци – документот треба да помине во комисијата за надворешни работи на Долниот дом, потоа да се гласа од пратениците во Конгресот, па заминува во комисијата за надворешни во Сенатот и потоа треба да биде одобрен и во Горниот дом. Со барањето на Санчез за усвојување по итна постапка рокот може да се намали на половина.
Македонскиот Парламентот ја усвои резолуцијата за членство во НАТО во 1993 година, две години подоцна земјава се приклучи кон програмата Партнерство за мир, Алијансата отвори своја Канцеларија во Скопје во 1997 година, а статус на земја кандидат станавме во 1999 година.
Земјава беше најблиску до членство во Алијансата во 2008 година на Самитот во Букурешт. Тогаш беше констатирано дека Македонија е технички подготвена за прием кој, сепак, беше попречен поради грчкото вето за нерешениот спор за името. Откако беше надминат по речиси три децении, вратата за Алијансата се отвори и земјава мошне скоро и официјално ќе стане 30. членка на најголемиот воено-политички сојуз во светот.