Македонија е со 12.207 активни случаи на ковид-19 во моментот од кои најголем број или 5.714 има во Скопје. Следен по главниот град е Тетово со 951 активен случај, потоа Куманово со 937, Гостивар со 497, Охрид со 491, Кичево со 411, Струга со 364, итн.
Според вчера објавените податоци од Институтот за јавно здравје (ИЈЗ), регистрирани се нови 525 случаи со ковид-19 од 3.858 тестирања. Пријавени се 18 починати лица од кои 12 во изминати 24 часа, а шест со дијагноза ковид-19 од „Мој Термин“ со датум на смрт во период од 22 август до 19 септември 2021. Евидентирани се и 449 оздравени пациенти.
Министерот за здравство Венко Филипче во телевизиско гостување вчера рече дека засега ќе нема нови рестриктивни мерки или некои препораки, освен тоа што сега е како критериум (една примена доза на вакцина) се бара за влез на настани, во угостителски објекти, молови, итн. Од средината на октомври, нагласи тој, ќе има мерка со која ќе може да функционираат само целосно вакцинирани граѓани.
Посочи дека станува збор за мерка која ја воведуваат сите земји во Западна Европа и за патување, за влез на граници, настани, угостителски објекти итн. Целта е, појасни министерот, да имаме што поголем процент на опфат со вакцинација кај нашето население, кое сега е околу 37 проценти на тоталната популација.
Во врска со училиштата, потенцира дека тоа што го подготвуваат е на еден начин скрининг, имајќи предвид дека можно е децата да се и асимтоматски преносители на вирусот.
– И во таа смисла сега правиме план и со директорите на центрите за јавно здравје, на здравствените домови, кадарот, начинот на кој тоа ќе се направи, како да обезбедиме доволна бројка деца кои ќе се тестираат во сите училишта во сите градови, за да имаме еден пресек на состојбата врз основа на што можеби ќе пресретнеме и некој случаи кои се асимптоматски па ќе може да носиме некакви мерки и препораки. Дотогаш останува препораката дека согласно тоа дека има малку заболени деца тешко е да се каже дали има трансмисија во училиштата заради тоа што децата и после часовите често комуницираат, се дружат, одат на спортови итн, препораките остануваат исти, рече Филипче.
Министерството за здравство вчера ја објави анализата на вакцинирани од позитивни случаи со ковид 19, во период од 6 август до 23 септември. За вакцинирани, како што се посочува, се сметаат лицата кои се вакцинирани со две дози и минале најмалку 14 дена од примање на втора доза вакцина.
Во период од 6 август до 23 септември, како што се наведува во анализата, починале 1.033 лица со ковид-19, 888 пациенти од починатите не биле вакцинирани, а само 14 отсто примиле вакцина.
„Според анализите, починатите имале повеќе комбинирани хронични заболувања. Пациентите биле вакцинирани со сите типови вакцини кои ги има на располагање кај нас, како и пациенти кои се вакцинирале во странство со вакцини на „Модерна“ и „Џонсон“. Секоја вакцина која ја имаме на располагање е безбедна, посочуваат од Министерството и апелираат граѓаните да се вакцинираат, бидејќи само така ќе се дојде до колективен имунитет и ќе се спречи ширење на мутациите на СарсКов2.