Францускиот претседател Емануел Макрон вели дека САД и Франција заедно со нивните сојузници мора да останат во Сирија и по завршувањето на војната за да ја изградат „новата Сирија“.
– Мораме да ја изградиме новата Сирија откако војната ќе заврши, изјави Макрон во интервју за „Фокс њуз“, додавајќи оти американската улога ќе биде многу важна во овој процес.
Макрон вели дека со шефот на Белата куќа има „посебен однос“, бидејќи двајцата се политички „нескротливи“, бидејќи не се дел од класичниот политички систем, а ги поврзува борбата против тероризмот и приврзаноста кон слободата и мирот.
Тој најави дека при посетата на САД, од Конгресот ќе побара поддршка за да се намали влијанието на диктаторите и на непријателските држави.
– Ние имаме посебен однос затоа што двајцата сме веројатно тие кои се нескротливи во системите во двете држави. Мислам дека изборот на претседател на Трамп беше неочекуван во вашата земја, а веројатно и мојот избор беше неочекуван во мојата земја. А ние не сме дел од класичниот политички систем, вели Макрон.
„Фокс њуз“ наведува дека главниот дел на неговата посета на САД, со која се одбележуваат 250 години од американско-француските односи, ќе биде вечерата во Белата куќа, која Трамп ќе ја приреди за Макрон.
Францускиот претседател ќе биде првиот странски државник, кој ќе вечера во резиденцијата на Трамп од неговото доаѓање на власт во САД.
За време на посетата на САД, Макрон ќе му подари на Трамп даб, како симбол на силните врски меѓу двете земји, соопшти телевизијата „Фокс њуз“
Станува збор за северен француски даб, за кој Макрон се надева дека ќе биде засаден во паркот на Белата куќа, како симбол на ова силно пријателство, изјави новинарот Крис Валас, кој го интервјуираше Макрон во Елисејската палата.
Макрон од утре ќе биде во тридневна посета на САД.