По позитивните оценки од Европската Комисија (ЕК) за Северна Македонија и за Албанија, Германија се залага за брз почеток на преговорите за членство на двете земји во ЕУ, изјави германскиот министер за надворешни работи Хајко Мас.
„Двете земји направија јасен прогрес во клучните реформи области, особено во зајакнувањето на судскиот систем и борбата против организираниот криминал. Ние ги споделуваме позитивните оценки на ЕК. Затоа се залагаме за брз старт на преговорите за членство во ЕУ. Пристапните преговори се најдобрата алатка што може да им се даде на Албанија и на Северна Македонија и најдобрата можна поддршка за натамошен напредок“, оценува Мас.
Шефот на германската дипломатија предупредува дека ново одложување на старт на преговорите ќе биде штетно за двете земји, но и за ЕУ и Германија.
„Без охрабрувачки знак од ЕУ, ќе го загрозиме големиот напредок постигнат во последните години. Тоа ќе им наштети и на интересите на ЕУ и на Германија. Ни требаат стабилни, ефикасни и демократски држави на Западен Балкан“, истакнува Хајко Мас во пишаната изјава објавена на веб страницата на германското МНР по објавените позитивни извештаи на ЕК за Северна Македонија и Албанија и обновената препорака за старт на пристапните преговори.
Европската комисија, во вчера објавените извештаи, нагласува дека Скопје и Тирана ги исполниле критериумите за почеток на преговорите и оти очекува Советот на ЕУ во наредните недели да донесат позитивна одлука.