Англиската фудбалска репрезентација наиде на топло добредојде во Приштина во последниот меч во квалификациите за Европското првенство во 2020 година. „Гордиот Албион“ и пред настапот на стадионот „Фадил Вокри“ го завери учеството на континенталниот турнир во наредното лето додека домашната селекција по поразот од Чешка ги загуби шансите за второ место во групата А. Па, гостувањето на тимот на Герет Саутгејт беше искористено за пораки од трибините.
„На Косово нема место за расизам. Нашата куќа е куќа и на нашиот пријател“, гласеше една од нив.
Интонирањето на двете химни мина со картонски знамиња во рацете на гледачите. И за време на косовската и за време на англиската, а зад еден од головите беше растегнат и транспарент на кој пишуваше „Добредојдовте сакани Англичани и почит“ и „Додека проживувавме геноцид и силување на жени, вие ја негувавте нашата надеж за слобода. Засекогаш благодарни на Англија“.
„Навивачите на Косово се заблагодарија на Англија за помошта за време на војната во доцните 90-ти години од минатиот век“, гласеше констатацијата на познатиот британски таблоид „Сан“ при пренесување на атмосферата од стадионот во Приштина.
Што се однесува до самиот меч, Англичаните победија со 4:0 со головите на Хари Винкс во 32. минута, на Хари Кејн во 79. минута, на Маркус Рашфорд во 83. минута и на Мејсон Маунт во судиското надополнување.
Квалификации за ЕП 2020
Група А
Косово – Англија 0:4
Бугарија – Чешка 1:0
Табела: Англија 21, Чешка 15, Косово 11, Бугарија 6, Црна Гора 3.
Група Б
Србија – Украина 2:2
Луксембург – Португалија 0:2
Табела: Украина 20, Португалија 17, Србија 14, Луксембург 4, Литванија 1.
Група Х
Албанија – Франција 0:2
Андора – Турција 0:2
Молдавија – Исланд 1:2
Табела: Франција 25, Турција 23, Исланд 19, Албанија 13, Андора 4, Молдавија 3.