Британската премиерка Тереза Меј денеска соопшти дека заедно со своите сојузници, ќе ги разгледа следните чекори, откако Русија соопшти дека ќе протера 23 британски дипломати од земјата, како реципроцитет на мерките од Британија, во врска со скандалот со труењето на поранешниот руски шпион Сергеј Скрипал и неговата ќерка, за што Лондон ја обвини Москва, која категорично ги демантира таквите тврдења.
– Нема да толерираме закана за животот на британските граѓани на територија на Британија од страна на руската Влада, изјави Меј на форумот на Конзервативната партија во Лондон.
Според анонимен извор од руското Министерство за надворешни работи, на Британците ќе им биде дадено време за затворање на конзулатот во Санкт Петербург, а датумот ќе биде одреден согласно меѓународните норми.
Русија денеска донесе одлука да прогласи 23 британски дипломати за „персона нон грата“, како одговор на протерувањето на ист број руски дипломати од Британија. Тие ќе треба да ја напуштат Русија најдоцна за една недела.
Властите во Москва одлучија да го затворат и Британскиот совет во Русија.
Русија има право да преземе и други мерки против Лондон доколку Британија направи уште некои непријателски чекори кон Москва.
Скрипал и неговата ќерка и понатаму се наоѓаат во критична состојба по труењето се нервен гас на 4 март.