Мексиканскиот боксер Саул „Канело“ Алварез испрати предупредување до Лионел Меси, кого го обвини дека не го почитува Мексико.
„Дали го видовте Меси како го чисти подот со нашиот дрес и знаме??“, твитна Алварез повикувајќи се на видео во кое Меси изгледа како да го клоца дресот на Мексико што е на подот за време на славењето на Аргентина во соблекувалната.
Нема индикации дека Меси намерно го шутнал дресот, туку тоа го направил случајно додека ги собувал копачките.
„Подобро да се моли на Бога да не го најдам!!“, порача Алварез преку втор твит со серија лути емотикони. „Исто како што јас ја почитувам Аргентина, тој мора да го почитува Мексико!“, повика тој.
Аргентина го победи Мексико со 2:0 во саботата во тензичен натпревар во групата Ц на Светското првенство во Катар. Меси го постигна воведниот гол, пред Енцо Фернандез да ја запечати победата со уште еден гол, кревајќи го моралот на Аргентина по неверојатниот пораз од Саудиска Арабија.
Алварез, кој се смета за еден од најдобрите мексикански боксери досега има освоено светски првенства во четири тежини. „Едно е што Аргентинците се подобри од нас во фудбалот, а друго е нешто што треба да се почитува“, порача тој.
Поранешниот соиграч на Меси од Аргентина, Серхио Агуеро му одговори на Алварез на Твитер, велејќи: „Г. Канело, не барај изговори или проблеми, сигурно не знаеш за фудбалот и што се случува во соблекувалната!“. „Дресовите секогаш ги фрламе на подот по завршувањето на натпреварите поради пот, а потоа ако погледнете правилно, тој прави движење да ја извади копачката и случајно го удира дресот на кој што е и знамето“, вели тој во уште еден твит.
Извор: Си-Ен-Ен