Во демант до медиумите, од Министерството за земјоделство (МЗШВ) велат, дополнителиот заменик министер за земјоделство, шумарство и водостопанство, Љупчо Николовски денеска уште еднаш скандалозно се однесувал заради лична промоција.
Николовски денеска во јавноста објави дека фирмите „Трансмет“ и „Силекс неметали“ добиле тендер од 25 милиони евра, а кои се во сопственост на „Силекс АД“, каде што Михаил Цветков во исто време бил член на одборот на директори и министер.
Во демантот, Министерството за земјоделство, шумарство и водостопанство упатува го прашува Николовски дали јавните набавки требало да ги спроведуваат законски за најповолна понуда или со субјективна селекција на компаниите.
Според Министерството со кое раководи Цветков, се што беше кажано од Николовски немало врска со вистината, а активностите за реализација на градбата на брана Речани се започнати од 2013 година.
– Владата уште во 2013 година го задолжи МЗШВ да го објави тендерот за изградба на пристапен пат до браната на Оризарска река, а во 2014 година да достави информација за прогрес на проектот брана на Оризарска река. Изградбата на брана на Оризарска река е ставена и во 10-годишниот План на Владата за инвестирање во водостопанската инфраструктура за период 2015-2025 година. МЗШВ редовно доставува информации до Владата, која на 25.февруари 2015 година го задолжи Министерството да ги преземе сите активности во насока на објавување оглас за изградба на брана Речани на Оризарска река, а во април 2015 година со донесувањето на Планот за инвестирање во водостопанската инфраструктура, го прифати и го одобри инвестирањето на овој Проект за период од 2015 до 2020 година, се вели во демантот.
Оттаму велат дека со тоа што огласот бил одобрен во декември 2015 година, Министерството побарало дополнително одобрение за повеќегодишното финансирање поради репрограмирање на финансиските средства, согласно одобрениот план за инвестирање од периодот 2015-2020 за периодот од 2016-2020 година.
– Постапката за избор на најповолен изведувач се одвиваше во две фази. Во првата фаза на предквалификација на огласот од декември 2015 година се јавија седум компании (3 домашни и 4 странски) од кои пет ги задоволуваа техничките услови, но во втората фаза понуди доставија три компании и тоа: Гранит, Трансмет – Силекс и Бетон – Скопје и учествуваа на електронската аукција. На електронската аукција најниска цена беше доставена од Трансмет – Силекс, се вели во објаснувањето на МЗШВ.
Минатата недела изминал рокот за жалба во кој ниедна компанија не доставила забелешка.