Го започнуваме процесот на издавање на еврообврзница. Процесот може да трае од 45 до 60 дена што значи дека следењето на пазарите на капитал и евентуално стабилизација, што се очекува да започне ќе ни овозможи да ги следиме условите и да видиме кога е најповолното време и износ со кој треба да се излезе на пазарот со еврообврзница, информира денеска на прес-конференција министерката за финансии Нина Ангеловска.
Ангеловска додаде дека Министерството започнало со процесот на издавање на еврообврзница, со цел да ги обезбеди потребните средства за да може да се заштити економијата.
Рано да се зборува колку компании ќе се пријават за мерката минимална плата
Министерката за финансии рече дека сè уште е рано да се зборува колку компании ќе се пријават за мерката од вториот економски пакет за минимална плата по вработен, бидејќи процесот на апликација не е започнат.
Таа посочи дека компаниите за мерката минимална плата од 14.500 денари по вработен ќе можат да аплицираат во текот на следните недели до 5 мај за да ја добијат финансиската поддршка за да им се помогне за платите за месец април.
„За оваа мерка во моментот не можеме да разговараме за бројки, затоа што сè уште не започнал процесот на апликација за да кажеме колку компании се пријавиле. Она што исто така е важно да бидеме прецизни и точни во комуникацијата, да не креираме нејаснотии и дилеми“, рече Ангеловска.