Потпретседателот на ВМРО-ДПМНЕ и носител на кандидатската листа за пратеници во Втората изборна единица, Владо Мисајловски при денешната посета на Шуто Оризари истакна дека на овие избори граѓаните треба да изберат меѓу Зоран Заев кој, како што рече, го заборави народот и единствено се грижи за своите бизниси или Христијан Мицкоски, чесен човек кој секогаш ќе биде со народот.
Мисајловски потенцираше дека Шуто Оризари е целосно запоставено од владата на СДСМ и Зоран Заев кои, како што рече, тука ниту ги остварија ветувањата за подобра инфраструктура, а ниту за подобар живот на младите кои поради невработеноста се иселуваат и среќата ја бараат надвор од Македонија. Додаде дека таквото време завршува на 15 јули, кога власта ќе ја преземе ВМРО-ДПМНЕ како единствена партија која го остварува тоа што ветува и единствена партија која гради инфраструктура.
„Ќе има многу проекти, 1.000 километри регионални и локални патишта кои се многу потребни за граѓаните, ќе се намалат трошоците за извршителите, се обврзуваме, сите млади квалитетни луѓе ќе го добијат својот правец, поголеми плати за 25 отсто, поголеми пензии за 20 отсто, а за младите до 29 години ќе има посебно место за вработување во бизнисот да нема давачки за нив“, изјави Мисајловски.
Мисајловски посочи дека во владата на ВМРО-ДПМНЕ никој нема да биде заборавен, особено социјално загрозените категории на граѓани.