Горан Наќевски, татко на Александар Наќевски, едно од убиените момчиња кај Смилковското езеро во 2012 година, на денешното рочиште за случајот „Монструм“, побара од судот стражарно да го приведе премиерот Зоран Заев, затоа што како тогашен опозиционер и политички противник на ДУИ им изнел конкретни докази за вмешаност на функционери од оваа партија во петкратното убиство.
Таткото, на денешното рочиште, под морална и кривична одговорност побара да даде изјава пред судот, што му беше дозволено од судијата Огнен Ставрев.
Во изјавата тој го обвини Заев дека откако е во коалиција со ДУИ тој манипулира со доказите за овој случај.
„Кога бевме кај Заев рече дека ќе ни даде 6 разговори – државна тајна за 6 функционери на ДУИ. Но, подоцна тие станаа 5. ДУИ тогаш беше нивен противник. Заев ни ги покажа транскриптите, ни го посочи Невзат Бејта и ни покажа транскрипт од разговор меѓу Бејта и обвинетиот Фејзи Азири. Не го исполни ветувањето, од политички причини не ни ги даде тие 5 државни тајни“, рече Наќевски.
Тој од име на сите родители, побара да биде извршен претрес во седиштето на СДСМ.
„Тврдам дека тие транскрипти се таму. Бараме да не соочите со премиерот Заев, дека не лажеме и не измислуваме. Стражарно приведете го, ќе го почекаме“, рече Наќевски.
Судот не се изјасни за барањата на родителите на четирите убиени момчиња кај Смилковско езеро.
Пред судот се обрати и мајката на Александар Наќевски, Зорица Наќевска која побара од судот и обвинителството да ја утврдат вистината.
„Судот и обвинителството да ги утврдат улогите на обвинетите, дали се извршители или помагачи. Бараме и да се декодираат броевите кои во пресудата се заведени како државна тајна, а се на функционери од ДУИ“, рече Наќевска.
Таа побара и да се октријат нн сторителите кои биле посочени од заштитениот сведок но не биле вклучени во истрагата бидејќи биле недостапни за органите на прогонот.
Мајката на Александар прочита и транскрипт од разговор кој наводно се водел помеѓу обвинетиот Азири и едно од непознатите лица.
„Вечерва сонував еден многу лош сон како му ги врзав рацете на момчето, па плачев, па сега си велам да не се израдувам да не не го довршив тој никаквец“.
Таа од судот си го побара и мобилниот телефон на својот син кој за нив како што рече, бил многу вреден.
– Децата ни ги убија во четврток вечерта, во петок ни ги донесоа, а нивните очи беа отворени. Се до саботата, додека да ги погребаме им течеа солзи. Сите тие што го извршија грозоморниот чин да се плашат од тие солзи, заврши Зорица Наќевска.
Рочиштето за случајот „Монструм“ прво откако го презеде СЈО, денеска на самиот почеток веднаш беше прекинато и одложено за 15 мај, поради отсуство на обвинетиот Фејзи Азири кој бил хоспитализиран на пулмологија.
Обвинителката Фатиме Фетаи реагираше поради одложувањето на рочиштето. Според неа, несериозно е отсуството на обвинетиот да се правда само со еден документ дека е во болница. Судијата рече дека ќе побара целосна болничка документација за Азири.
„Ви ветувам одиме до крај, брзо ќе дојдеме до вистината. Од вас барам само да ми помогнете и да бидете уште малку трпеливи“, им рече судијата Ставрев на револтираните родители.
Обвинителката на СЈО, Фатиме Фетаи по завршувањето на денешното рочиште даде куса за изјава за медиумите и рече дека СЈО ќе стори се за да се дознае вистината за петкратното убиство кај Смилковското езеро.
-Едно можам да кажам, дека ќе ги искористиме сите ресурси и човечки и технички за да ја утврдиме вистината, рече Фетаи.
Масакрот кај Смилковското Езеро се случи на 12 април 2012 година, на Велики четврток, пред големиот христијански празник Велигден, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски.
За петкратното убиство беше отворен предмет „Монструм“, а на доживотен затвор беа осудени Алил Демири, Африм и Агим Исмаиловиќ и Езим и Хаки Азири и Сами Љута.
Врховниот суд во декември лани ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири, и им определи мерки на претпазливост. За судот се уште недостапни се Алил Демири и Африм Исмаиловиќ по кои се распишани меѓународни потерници