Министерството за здравство (МЗ) соопшти дека Државниот санитарен и здравствен инспекторат (ДСЗИ) спроведува вонреден инспекциски надзор за утврдување на причината за смртта на велешкиот пациент. Според информациите добиени од Општата болница во Велес, посочуваат од МЗ, на 31 март околу 16 часот од дежурниот лекар на инфективното одделение бил прегледан пациент на 78 годишна возраст кој бил донесен како итен случај со возило на Итната медицинска помош, бидејќи од претходно имал закажан термин од матичен лекар за 19:20 часот.
Пациентот бил болен четири до пет дена пред прегледот, со зголемена телесна температура и кашлица со искашлување на секрет, лекуван од матичен лекар со антибиотик – парацетамол и витамини. Роднините негирале епидемиолошка поврзаност со контакти сомнителни или заболени од коронавирусна инфекција.
На денот на прегледот, членови на фамилијата забележале розеникав, по боја, искашлок кај пациентот и побарале да му биде земен брис од страна на епидемиолошката служба и да биде прегледан неколку часови порано од веќе закажаниот термин. Во моментот на преглед, пациентот бил без температура, во стабилна општа состојба со бронхитичен наод на бели дробови, поради што му е ординирана антибиотска терапија, бронходилататорна, експекторанс, витамини и даден совет за домашна изолација, како и контрола на резултатот од земениот брис. Се било уредно евидентирано – со документација, а проценка на докторот е според симптоматологијата како да постапи. Земена е епидемиолошка анамнеза и од неговата ќерка, информираат од Министерството.