На почетокот на следната недела ќе биде познато дали изолацијата на лица кои се позитивни на ковид-19 ќе се намали од десет на седум дена. Иако новиот Омикрон сој се шири многу брзо, сепак надлежните тврдат дека сè уште има слободни капацитети во болниците во земјава.
Во меѓувреме продолжува апелот до граѓаните да продолжат со вакцинацијата. Препораката за скратување на изолацијата доаѓа по вчерашниот состанок на Комисијата за заразни болести. Министерот за здравство, Беким Сали изјави дека оваа одлука не е конечна, затоа што, како што рече, во идниот период состојбата со новозарезани ќе се следи и соодветно ќе се носат препораки и одлуки.
Оваа препорака на Комисијата треба да се најде на Кризен штаб во понеделник, а веќе во вторник треба да биде и на седница на влада.
Во однос на задолжителното покажување на ковид сертификати, министерот за здравство потенцираше дека уште е рано да се зборува за нивно укинување, затоа што нивото на вакцинација на населението во земјава е многу помало во однос на другите земји.
Според последните податоци на Министерството за здравство (МЗ), во моментот во ковид-центрите во болниците се лекуваат 512 пациенти.
Од нив, 177 се сместени во ковид-центрите во Скопје, а 335 на инфективните одделенија во другите градови. Според дневната евиденција, во моментот има 188 слободни кревети за пациенти со компликации од ковид-19.
Модуларните болници се отвораат во услови кога се пополнети капацитетите на инфективните оделенија во рамки на болниците, потенцираа од МЗ.
Инаку, во текот на вчерашниот ден беа регистрирани 2.071 нов случај на ковид-19 од направени 6.010 тестови. Оздравени се 1.450 пациенти, а починале 11 лица.
Досега во земјава се направени вкупно 1.733.866 милиони тестирања на ковид-19. Вкупната бројка на ковид-дијагностицирани лица од почетокот на епидемијата изнесува 252.947. Бројот на оздравени пациенти е 225.056, на починати е 8.177. Има 19.714 активни случаи.