Од денеска, па во наредните десет денатрае пријавувањето до Службата за општи и заеднички работи на Владата за јавното наддавање за блиндираниот „мерцедес-бенз С 600″.
Почетната цена на наддавањето изнесува 14.372.208 денари и е одредена врз основа на направената проценка од страна на Министерството за правда и Бирото за судски вештачења.
Заинтересираните ќе можат да го разгледаат возилото на 7 март во периодот од 10 до 15 часот на адресата бул. „Гоце Делчев“ бб во гаражата на објектот на МРТВ. По истекот на рокот за доставување на понуди на 12 март комисијата ќе има рок од три дена за евалуација на понудите, а јавното наддавање ќе се изврши на 16 март во 10 часот по пат на електронска аукција на интернет страницата на Министерството за финасии. Понудувачот кој ќе достави најповолна понуда во рок од 15 дена од добивањето на известувањето за избор ќе треба да ја уплати сумата преку сметка во банка во Македонија по што ќе се склучи договор за купопродажба во рок од пет работни денови по извршената уплата. Доколку купувачот не ја плати целосната сума договорот нема да се случи, а банкарската гаранција ќе биде активирана, објасни директорот на СОЗР, Пеце Мирчевски.
За набавката на луксузниот мерцедес, СЈО, покрена обвинение „Тенк“. Процесот започна пред две недели. Обвинителите од СЈО во воведниот збор изјавија дека со фаворизирање на еден економски оператор МакАутостар и по желба на Груевски била спроведена незаконска набавка на мерцедес вреден 600 илјади евра.