На вчерашниот состанок на Централното претседателство на ДУИ воопшто не станало збор за истрагата што пред два дена ја отвори Специјалното јавно обвинителство за стопираниот попис на населението во 2011, изјави за НОВА, Артан Груби.
-Не, воопшто не се разговараше, одговори високиот функционер на ДУИ, на нашето прашањето дали на состанокот се разговарало за истрагата на СЈО за пописот, во која е осомничен партискиот лидер Али Ахмети.
Лидерот на ДУИ досега воопшто не излезе со коментар во јавноста за истрагата на СЈО.
На прес-конференцијата во средата, оваа недела, обвинителката на СЈО, Фатиме Фетаи информирајќи за истрагата рече дека осомничените Никола Груевски, како тогашен премиер и лидер на ВМРО-ДПМНЕ и Ахмети водејќи се од лични интереси се договориле да го стопираат пописот, а со тоа го оштетиле државниот буџет за околу 2,8 милиони евра.
-Постои основано сомнение дека со цел, како владејачка коалиција да го сокријат фактот дека немаат политички капацитет да организираат реален попис на населението, домаќинствата и становите во Република Македонија, како и да ги сокријат неповолните факти за демографската и економската состојба на населението, што резултирало со огромно иселување од Република Македонија на работоспособното население, осомничените помеѓу 10 и 11 октомври 2011 година се договориле да го стопираат пописот…Осомничените сфатиле дека со законита пописна операција ќе им се нанесе огромна штета на владејачките ДУИ и ВМРО-ДПМНЕ и со тоа на нив самите како лидери на овие партии, па водејќи се пред се од лични интереси, да ја задржат моќта во општеството, одлучиле дотогаш потрошените парични средства да ги фрлат во вода, со што го оштетиле буџетот на државата за 175.123.909 денари (околу 2,8 милиони евра), изјави Фетаи.
Истрагата на СЈО, велат од невладиниот сектор, ги потврдила сомнежите околу причините за пропаѓањето на пописот, што изминативе години циркулираа, па и јавно беа изнесувани во јавноста, но досега немаше никаква реакција од правосудните органи.
-Ние цело време тврдевме дека немаше политичка волја на ВМРО-ДПМНЕ и ДУИ, како тогашна владејачка коалиција за спроведување на регуларен попис. Но, никој не понесе одговорност, немаше истрага, меѓудругото и за парите. Пописот беше неуспешен и јасно е дека станува збор за политичка игра што СЈО сега ја истражува, вели за НОВА Билјана Бејкова од НВО Инфоцентар.
Оваа невладина организација во 2014 година објави анализа „Пописот е демократија, а не етничка бројка“ објавена од НВО Инфоцентарот во партнерство со Македонскиот центар за европско образование (МЦЕО), Центарот за развој на медиуми (ЦРМ) и 8-ми Септември.
Во анализата, меѓудругото се наведува дека сите соговорници опфатени во неа „се убедени дека пописот не успеа од политички причини или подобро кажано од етничко-политички причини“.
„Не би рекол дека има само една или две причини, туку е повеќе склоп на околности кои не беа поволни за владејачките партии. И двете парии настапија со агенда да се определи бројот на етничките заедници, односно бројот на граѓаните според етничка припадност, агенда врз основа на која ќе можат да си ги кројат плановите за партиски политики. На тоа се надополни и целосно партизираната и непрофесионална администрација надлежна за спроведување на пописот, и така целата операција стана дел од сцената на партизирани интереси кои се прикажуваат како административни процедури“, е ставот на еден од испитаниците во анализата, а друг вели дека „исто така, важно прашање е каде отидоа парите кои беа наменети за спроведување на пописот.
Екс премиерот и лидер на ВМРО-ДПМНЕ, Никола Груевски ги негираше наводите на СЈО и изјави дека не бил вклучен во постапката за пописот и оти тој бил спроведен од Државна комисија, која како што рече, одговорно и професионално си ја работела својата работа.
Последниот попис во Македонија беше спроведен во 2002 година, што ја прави земјава една од ретките во светот која една и пол деценија ја нема направено најважната статистичка операција.
Попис, како што изјави вчера директорот на Државниот завод за статистика, Апостол Симовски, веројатно ќе има во 2020 година.
Тој вели дека нема да се дозволи политизација, бидејќи како што истакнува пописот во 2011 година пропаднал токму заради политиката која влегла на голема врата со формирањето на државна пописна комисија.