Имунизацијата против ковид-19 во државата се одвива непречено, тврдат надлежните и најавуваат дека до петок ќе бидат вакцинирани пола милион граѓани. Од денеска е активна и веб-страницата за ревакцинација на граѓаните кои се вакцинирале во странство, а во понеделник ќе се разговара и за евентуални нови мерки за заштита на границата против ширењето на делта сојот на вирусот.
Комисијата за заразни болести в понеделник ќе треба да процени дали тестовите се вистинска мерка со која ќе може да се заштитиме од ширењето на делта сојот на коронавирусот, кој веќе се рашири низ Европа, и дали има потреба од воведување нови мерки во однос на заштита на границите.
Инаку, Министерството за здравство (МЗ) најмногу е фокусирано на вакцинацијата, а министерот Венко Филипче очекува до петок да бидат вакцинирани околу 500.000 граѓани.
– Поделени се сите вакцини, согласно бројот на пријавени граѓани. Во вторник ќе заврши вакцинацијата на сите пријавени граѓани во сите градови, освен во Скопје, во Тетово и во Битола. Во овие три градови ќе се вакцинираат сите пријавени граѓани до петок, што значи дека вкупната бројка на вакцинирани граѓани ќе биде околу 500.000, најави Филипче.
Тој потенцира дека теренска вакцинација ќе се интензивира следната недела и ќе придонесе да се вакцинираат жителите кои се хронично болни и помалку подвижни, а кои живеат во оддалечените места околу големите градови. Во однос на вакцинирањето на трудниците и доилките, ставот на Стручниот комитет е дека за нив треба да се преферира вакцината на „Фајзер“.
– Нема контраиндикација за ниту една вакцина, но се дава предност на фајзеровата вакцина, рече Филипче.
Според последниот извештај на МЗ, вакцинирани се вкупно 346.836 граѓани. Вкупно се аплицирани 572.176 дози на вакцини, а ревакцинирани се 225.340 граѓани.
– Со последните бројки, 52 отсто од населението над 70 години, 49 отсто од населението над 65 години и 43 отсто од населението над 60 години е вакцинирано со барем една доза вакцина, соопштија од МЗ.
Бројот на лица кои изразиле желба за вакцинација преку веб платформата „vakcinacija.mk“ досега е 481.809 граѓани. Масовната вакцинација се одвива во неколку градови во државата и тоа во СЦ „Борис Трајковски“ во Скопје, во спортските сали во Кавадарци, во Куманово, во Тетово, во Штип, во Битола, во Струмица, во Охрид, во Велес и во Прилеп.
Што се однесува до оние граѓани кои се вакцинирале во странство, а сакаат да се ревакцинираат во државата, тие можат да се пријават на веб-страницата „https://vakcinacija.mk/