Возбудата беше преголема, а речиси сите останавме без глас од скандирањето за Македонија! Презадоволни сме што во живо во Букурешт завчера го гледавме првиот настап на нашите фудбалери на европското првенство. Да можеме, би оделе и задутре на втората утакмица со Украина – раскажува Велимир Тричковски, физиотерапевт на Клиниката за инфективни болести и фебрилни состојби.

Тој зедно со уште 20 колеги присуствуваа на првиот меч на македонската репрезентација против Австрија, којшто, за жал, го загубивме со 3:1.

Во Романија отпатуваа инфектолози, специјалисти, лаборанти, медицински сестри, болничари, физиотерапевт. Тие вчера се вратија во Скопје, а некои веднаш преземале смена и продолжиле со работа на клиника.

Медицинарите од Инфективна раскажуваат дека, заедно и со другите навивачи од Македонија, биле убаво пречекани во Романија, а нагласуваат дека се задоволни од одличната организација на првенството, особено од односот на полицијата и од волонтерите на УЕФА.

– Ги освоивме и срцата на жителите на Букурешт и тие ни ја дадоа целата поддршка и за нашата репрезентација и нам како навивачи – нè поздравуваа секаде кадешто се движевме. Букурешт  беше обоен во црвено и жолто од нашите знамиња што ги виоревме постојано и низ градот, а особено на трибините во Националната арена. Домаќините беа одлични, а пријатно сме изненадени и од тоа што полицијата беше целосно во служба на нас, навивачите и тоа од влезот во Романија и прифаќање на граница на нашиот автобус за директно да возиме за Букурешт, па сè до организиран транспорт до стадионот во неделата попладне – вели Тричковски.

Пред да влезат во градот, тие прво биле однесени на тестирање за Ковид -19, а за да влезат на стадионот поминале низ три контроли.

Пред натпреварот, вработените од Инфективна велат дека во Букурешт шетале најмногу во стариот град, заедно со останатите околу 2.000 навивачи од цела Македонија.

– Запоседнавме речиси 50 отсто од кафулињата во стариот град, додека Австријците беа помалубројни…Атмосферата беше многу добра цело време, а вистинското доживување и возбуда нè  преплавија на трибините – почнувајќи од интонирањето на нашата химна, а кога Пандев го даде голот со кој изедначивме, бевме пресреќни, сите скокнавме од радост! Само што на стадионот гласните жици веќе нè  издадоа, бидејќи уште кога тргнавме од Скопје почнавме да пееме и да скандираме… Но нè понесе сета атмосфера таму, тоа што Македонија првпат игра на европско фудбалско првенство и еве презадоволни се  вративме во Скопје. Се надевавме на победа, но тоа е фудбал… – додава Велимир.

ФФМ им подари билети на овие навивачи, а Телеком им го организираше автобускиот превоз.

Пишува: Љубица Балабан