Премиерот Зоран Заев денеска изјави дека не се водат преговори за влез на ДПА во Владата.
– Јас не водам преговори со ДПА за влез во власта. Се надевам дека брзо ќе ги најдеме кадровските решенија за пополнување на испразнетите места, рече Заев, одговарајќи на новинарско прашање.
Заев истакна дека останува на определбата на сегашната владина коалиција за унапредување на соработката и со други политички субјекти и поединци во Парламентот, особено од важност за она што претставува национален интерес, реформи и главни приоритети на граѓаните на Република Македонија.
Лидерот на Алијансата за Албанците Зијадин Села вечра во интервју за емисијата „Патот кон“ на Алсат М рече дека останува во владината коалиција, а за новиот министер за здравство ќе се одлучи на партиските органи. Во врска со парламентарното мнозинство, Села смета дека тоа може само да се прошири, но не и да се намали.
-Ние сме дел од владата бидејќи преземавме обврски за продолжување на реформите и за да бидеме во владата како дел што секогаш ќе алармира кога оваа влада ќе изгледа како минатата. Ние во моментов сме дел од Владата. Единствениот политички чинител во Владата кој сака Алијансата за Албанците да не биде таму, да нема владина коалиција е ДУИ и Али Ахмети. Ова беше кажано повеќе пати во текот на кампањата, дури имаше и констатации дека Алијансата ја напуштила коалицијата, вели Села и додава:
-Желбата на ДУИ, Алијансата да ја напушти Владата може да се исполни само ако извршната власт почне да личи на претходната влада предводена од ВМРО-ДПМНЕ.
Фатон Фазлиу, портпарол на движењето БЕСА за Алсат М изјави дека иако досега не одржале состанок со СДСМ за можно учество во владата во случај на реконструкција, вели дека ќе се анализираат сите можности за да станат дел од парламентарното мнозинство, ако станува збор за членството на Македонија во НАТО и во ЕУ.
-Ние сите знаеме дека оваа влада се повикува на реформи и одредени реформи требаше досега да го започнат патувањето на оваа земја кон евро-атлантските интеграции. Гледаме дека досега не постои таков момент, ако има ќе размислиме, а потоа ќе излеземе со конкретен став, вели Фазлиу од Беса.