Талибанците им забранија на берберите во авганистанската провинција Хелманд да бричат или шишаат бради на нивните клиенти, заканувајќи се со казни, пренесува „Би-Би-Си“.
Талибанската верска полиција во Хелманд тврди дека бричењето или сечењето на брадата го крши она што тие го сметаат за исламски закон.
Некои сопственици на фризерски салони во главниот град Кабул потврдија дека добиле слични нарачки кои сугерираат на враќање на строгите правила што беа воспоставени за време на претходното владеење на Талибанците, и покрај нивните ветувања дека ќе спроведат поблага форма на државна контрола.
Од преземање на власта во минатиот месец, Талибанците спроведоа остри санкции против нивните противници, а во саботата борците на организацијата убија четворица обвинети киднапери и ги обесија нивните тела на улиците во провинцијата Херат.
Талибански борци постојано доаѓаат и ни наредуваат да престанеме да ги сечеме брадите. Еден од Талибанците ми рече дека можат тајно да ја спроведат контролата, изјави фризерка од Кабул.
Во наредбата што е испратена до фризерските салони во јужната провинција Хелманд, талибанските власти предупредија дека мора да се почитува шеријатскиот закон, кој не дозволува шишање и бричење на брадата.
Никој нема право да се жали, пишува во соопштението.
Друг фризер од Кабул, кој раководи со еден од најголемите салони во градот, рече дека бил поканет од некој кој се претставил како државен службеник и му наредил да „престане да ги следи американските стилови“ и никому да не шиша или бричи брада.