Како што соопштија обвинителките на СЈО на денешната прес-конференција, податоците за прислушуваните броеви во моментов се само од еден телефонски оператор, чие име поради истрагите не се објавува, а се чекаат судски налози поднесени за прибавување на податоци од други оператори кои се изјасниле дека не поседуваат прислушувани броеви.
Обвинителката Ленче Ристовска, одговарајќи на новинарско прашање соопшти дека покрај новинари, следени биле луѓе од најразлични профили, а помеѓу нив и министрите од владата на ВМРО-ДПМНЕ.
Екс-министерката Гордана Јанкуловска била прислушувана 732 дена незаконски, а екс-министерот Миле Јанакиески, кој поседувал неколку броеви, бил следен 732 дена на едниот, 553 на вториот, додека 816 дена на третиот број.
Лидерот на ДУИ, Али Ахмети бил следен најмалку 338 денови на едниот број и 867 денови на другиот свој број. Лидерот на ДПА, Мендух Тачи и на едниот и на другиот телефонски број бил следен 1257 денови.
Лидерот на Обединети за Македонија, Љубе Бошковски, на едниот бил следен 320 дена, а на другиот број 92 дена. Муса Џафери од ДУИ бил следен 1658 денови и слично.
Според податоците кои СЈО ги има обработено досега, екс-премиерот Никола Груевски не бил таргет, но на телефонските разговори го има ако се земе предвид дека разговарал со оние што биле прислушувани.
Новинарот Борјан Јовановски бил следен и на двата свои телефонски броеви кои ги користел. Од 31.02.2010 до 10.01.2013 година е следен на едниот број додека од 25.12.2012 до 10.03.2015 е следен на другиот број кој го користел.
Новинарката Сашка Цветковска била следена од 10 фебруари 2014 до 15 март 2015 година, вкупно 183 дена во тој период.
Комуникациите на новинарката Мери Јордановска биле следени од февруари 2014 до март 2015 година, додека телефонот на Горан Михајловски, уредник на сајтот „Сакам да кажам“ бил следен од 01.02.2013 до 10.03.2015 година.
Следени биле уште десетици други новинари, а повеќето од нив веќе поднеле тужби преку адвокатот Филип Медарски.