Истражната комисија во рамки на словенечкиот парламент во вторник и во среда ќе сослуша неколку сведоци во обид да открие траги од финансирање на предизборните активности на СДС, партијата на актуелниот премиер, Јанез Јанша.
Според извештаи на медиумите во Словенија, комисијата ќе ги испита наводите за перење пари преку Нова кредитна банка Марибор (НКБМ), која беше преземена од унгарската ОТП групација на почетокот на јуни 2021 година.
Како што се наведува, истрагата за незаконско финансирање на СДС опфаќа и претходни периоди, поточно 2018 година кога во Словенија беа распишани предвремени парламентарни избори.
Комисијата, исто така, треба да испита неколку лица кои се инволвирани во работата на медиумските куќи под контрола на Јанез Јанша и неговата партија, а меѓу другите имиња кои се споменуваат во целата приказна се министерот за внатрешни работи, Алеш Хојс, поранешниот генерален секретар Божо Предалиќ и пратеникот на СДС, Дејан Калох.
Словенија во април 2022 година ќе организира парламентарни избори, а медиумите наведуваат дека СДС може да има предност пред политичките ривали, токму поради неограничените финансиски средства кои доаѓаат од странство.
Документите покажуваат дека од 2017 до 2020 година, на сметки на фирми поврзани со физички лица од СДС, биле префрлени најмалку 12 милиони евра пари од унгарски физички и правни лица. Во овие 12 милиони евра не се вклучени средствата што фирми и поединци од Унгарија ги вложиле во капиталот на медиумите на СДС, пишува порталот нецензурирано.си.
Како што се наведува, парите на сметките поврзани со СДС почнале да доаѓаат во пролетта 2017 година, кога Јанез Јанша сè уште беше активен во опозицијата. Тоа е периодот кога Јанша го освои и осмиот мандат на чело на СДС, а за првпат на конгресот на партијата пристигна и унгарскиот премиер Виктор Орбан.
Медиумската куќа Нова24ТВ во тоа време официјално стана сопственик на три унгарски медиумски куќи од кругот на унгарскиот премиер Орбан и неговата партија Фидес. Се наведува дека „тоа е веќе периодот кога Јанша и Орбан направија близок политички сојуз“.
Пари од Унгарија дошле и подоцна, во 2019 година, на сметки на медиуми блиски до СДС и Јанша, а се наведува дека извршен директор на Нова24 ТВ во тој период бил актуелниот министер за внатрешни работи Алеш Хојс.
„Медиумот за само неколку недели доби две големи дознаки во износ од 268.700 евра. Во лоша деловна година компаниите добиле повеќе од еден милион евра унгарски пари на банкарски сметки“, пренесуваат словенечките медиуми.