Заболените од ковид-19 од денеска ќе се лекуваат и со крвна плазма, како и со примена на озонотерапија во ГОБ „8 септември“, а на Институтот за трансфузиона медицина е закажана првата екстракција што ќе се користи за третман на овие пациенти.
Озонирањето на крвта е метода што се користи за третманот, пред сè, за најтешките пациенти. Станува збор за метода со која се озонира одредена количина на крв која се вади, се озонира и се враќа во циркулација.
Како што рече министерот за здравство Венко Филипче на вчерашната прес-конференција, има публикации и искуства од други земји и врз основа на тие искуства тим на анестезиолози од болницата „8 септември“ направил детална анализа на обемна литература и заклучил дека вреди да се направи обид и оваа терапевтска мерка да се аплицира кај пациентите.
Терапијата со плазма од пациенти кои се излекувале од коронавирусот најпрво почна да се применува во Кина кон крајот на март за што стигнаа позитивни вести. Пет критично болни лица во Шенжен, кои беа заразени во ковид-19, добија рековалесцентна плазма. Сите беа на возраст од 36 до 65 години и приклучени на респиратори.
Три дена по примање на плазмата, кај четворица од нив дојде до намалување на телесната температура, во рок од 12 дена беше решен акутниот респираторен стрес кај нив, а тројца беа пуштени од болница. Петмината дарители на плазма беа лица на возраст од 18 до 65 години и сите беа излекувани од коронавирусот најмалку десет дена пред донирање на плазмата.
Министерот Филипче вчера истакна дека, според последните анализи, се очекува бројот на заразени да биде меѓу 1.600 и 1.700 заразени, но оти не би избрзувал со очекувањата за пикот на ковид-19 во земјава.
„Тоа од што стравуваме е да не станува збор за поединечна варијација, како што беше во едно друго сценарио кога имавме еден пик во смисла на исклучок на над 100 дијагностицирани пациенти. Така да, сметам дека сè уште не би избрзувале. Сепак, сакаме да видиме последователно повеќе денови еден ваков тренд за да кажеме, добро, поминат е пикот, и да очекуваме во континуитет и во следните денови намалување на бројот на случаи. Искрено се надеваме дека така ќе биде. Но, малку е рано иако трендовите тоа ни го најавуваат, но сме многу внимателни“, рече вчера Филипче.
Од наредната недела Министерството за здравство ќе почне со набавка на кревети за интензивна нега, респиратори, аспиратори, перфузори, инфузиомати, мобилен рендген, ехо апарати и е-опрема со средствата собрани од донациската сметка за справување со ковид-19 кои се близу 90 милиони денари.