Новата методологија за проширување на Европската унија ќе биде презентирана на 5 феверуари, дознава Нова ТВ од дипломатски кругови од Брисел. Веста е само потврда на вчерашната порака на Ана Писонеро, портпаролка на Европската комисија (ЕК), дека извештајот за новата методологија на преговори нема да биде објавен на 29 јануари како што се очекуваше.
Таа додаде дека ЕК никогаш официјално не соопштила оти извештајот ќе биде објавен на 29 јануари и нагласи дека ќе нема извештај на тој датум. Извештајот за новата преговарачка методологија на ЕУ во процесот на проширување е еден од неформалните услови побарани од страна на Франција, услов кој го поддржуваат и низа други земји членки на ЕУ.
Писонеро најави дека во пресрет на состанокот на шефови на држави и влади на ЕУ и Западен Балкан во Загреб во мај ќе биде објавен и економски инвестициски план за регионот чија цел е да се „интензивира присуството“ на Унијата во процесот што ќе биде од корист на двете страни.
Информацијата на Нова ТВ е на неколку часа до денешната посета на претседателот на Европскиот совет, Шарл Мишел на Северна Македонија, каде ќе има средби со високи претставници на земјава, на кои се очекува да се разговара токму за новата методологија на преговарање, како и за текот на реформскиот процес.
Претседателот Стево Пендаровски ќе биде домаќин на првиот човек на Европскиот совет, кој во земјава ќе допатува од Тирана. Пендаровски и Мишел попладнево ќе имаат тет-а-тет средба, а потоа ќе одржат заедничка прес-конференција.
Посетата на првиот човек на Европскиот совет, доаѓа десетина дена откако во Скопје допатува еврокомесарот за соседска политика и преговори за проширување, Оливер Вархеји. Тој ја потврди европската перспектива за Западен Балкан и најави дека повторно ќе биде побаран почеток на преговори за Северна Македонија, за што ќе одлучува Советот во март. Вархеји, исто така, потенцираше дека добар сигнал за Европската Унија ќе биде и доколку законот за Јавно обвинителство биде донесен пред распуштањето на Собранието во февруари.