Дури и откако лидерот на СДСМ, Зоран Заев ја објави првата „бомба“ и на новинарите чии телефони со години биле прислушувани од власта, им ги предаде папките со транскрипти и аудио записи од нивните разговори, прислушувањето на новинарите не запрело.
Раководни лица во УБК ги слушале разговорите на новинарите дури и еден месец по објавувањето на првата бомба на 9 февруари минатата година. Ова денеска на прес конференција го соопштија од СЈО, презентирајќи го новиот случај под кодно име „Таргет“ во кој осомничени се 10 лица од УБК дека нелегално прислушувале.
Обвинителката Ленче Ристовска денеска рече дека голем број бизнисмени, новинари и политичари биле прислушувани.
Новинарот и уредник на НОВАТВ Борјан Јовановски бил следен цели три години, од 31.02.2010 до 10.01.2013 година е следен на едниот број додека од 25.12.2012 до 10.03.2015 е следен на другиот број кој го користел. Неговата колешка и уредник на истражувачката редакција во медиумот Сашка Цветковска, била следена во периодот од 10 февруари 2014 до 15 март 2015 година. Според податоците кои ги сподели СЈО, нејзиниот број бил слушан 183 дена во овој период.
„Нема ништо ново во денешната прес конференција освен официјална потврда дека нашите животи не ги следеле никакви странски служби туку дека тоа го правеле оние кои биле платени од наши пари да ја штитат нашата приватност. Мене денеска ми е интересна информацијата дека моите комуникации се следени и во 2014 година. Претпоставувам тогаш посебно ги интересирала мојата комуникација со мојата најблиска соработничка , колешката Сашка Цветковска која работеше напорно и долго на големото истражување за бизнисите на шефот на разузнавањето Сашо Мијалков. Веројатно во таа комуникација барале нешто што би можело да ја компромитира работата на Цветковска но очигледно безуспешно затоа што сторијата се објави и ја доби и наградата за истражувачко новинарство од ЕУ“, вели Јовановски.
Новинарката Цветковска вели дека периодот кога биле прислушувани бил еден од најплодните за истражувачката редакција на НОВАТВ.
„Слушани сме во периодот кога сме работеле најинтензивно на истражувања како она за имотот на Сашо Мијалков со нашите партнери од ОССРП, тогаш ги работевме истражувањата за медиумска сопственост кои открија врски помеѓу партијата и сомнителни компании, ги истражувавме бизнисите на моќниот Јордан Камчев, русинот Сергеј Самсоненко и многу други. Овој период беше еден од најплодните во нашата истражувачка редакција, а многу е интересно дека ден откако е прекинато слушањето на мојот телефон е објавена сторијата за имотот на кумот на Груевски и други поврзани лица од бизнисот и политика на Водно, откако НОВАТВ работеше на дополнителни истражувања за оваа афера која првично беше објавена во бомбите. Веројатно сакале да знаат со кого комуницираме, кои ни се изворите и слично“, смета Цветковска.
Телефонот на Мери Јордановска, новинарка во Балканската истражувачка мрежа БИРН бил слушан од февруари 2014 до март 2015 година. Јордановска вели очигледно оние што прислушувале се чувствуваат слободни оваа држава да ја користат како фамилијарна приватна фирма, притоа не земајќи предвид кому ќе наштетат.
„Самиот факт што УБК продолжило со прислушувањето дури и по објавувањето на т.н. бомби, па дури и откако осомничените за Пуч, како Ѕвонко Костовски, беа осудени на затворска казна, недвосмислено кажува кој го вршел прислушувањето. Сигурно дека Костовски не прислушувал откако веќе бил осуден. Сето ова говори дека УБК била во рацете на луѓе кои буквално не чувствувале ниту страв ниту одговорност ниту пак се чувствувале загрозени за незаконските дејства што ги правеле – затоа што една деценија, се е во нивни раце. Тие се чувствуваат слободни оваа држава да ја користат како фамилијарна приватна фирма, притоа не земајќи предвид кому ќе наштетат“, вели Јордановска.
По објавувањето на бомбите се уште бил следен и телефонот на Горан Михајловски, уредник на сајтот „Сакам да кажам“ и поранешен уредник на дневниот весник „Вест “бил следен од 01.02.2013 до 10.03.2015 година.
Михајловски во изјава за НОВА вели дека не е изненаден, но е шокиран дека и откако ја добил папката со прислушувани разговори, власта продолжила да прислушува. Тој е убеден дека власта се уште го прислушува неговиот телефон.
„Не сум изненаден, но сепак сум шокиран од тоа што дури и откако ја добив мојата папка со прислушуваните разговори власта продолжила да ме прислушува. Шокиран сум и од бескрупулозноста на нарачателите, но и на извршителите на овие криминални активности кои ги повредуваат моите основни човекови права. Не сум шокиран од злоупотребата на државните ресурси со кој е направен овој упад во мојот приватен и професионален живот. Не сум шокиран ниту од сознанието дека сакаат да ме контролираат за да може да ме уценуваат. Тие таа контрола и уцена со наши пари ја прават, на еден или на друг начин, со сите граѓани на Република Македонија веќе 10 години. Но пострашно од прислушувањето е што не сум убеден дека на овој суд ќе можам да ја истерам правдата. А најстрашно е што сум убеден дека и сега ме прислушуваат“, смета Михајловски.
Преку правни застпаници десетици новинари веќе водат постапки за да се утврди кој ги прислушувал откако минатата година лидерот на СДСМ им подели аудио разговори и транскрипти од следени телефонски разговори во УБК.