Гувернерот на американската сојузна држава Њујорк, Ендрју Куомо соопшти дека поднесува оставка. Неговата функција во преостанатиот период од мандатот ќе ја презеде Кети Хочул, потполковник од редовите на демократите, и ќе биде првата жена гувернер на државата.
Оставката доаѓа откако јавната обвинителка Летиција Џејмс ги истражи обвинувањата за сексуално вознемирување против гувернерот што ги поднесоа 11 жени. Тоа вклучува девет сегашни или поранешни државни службенички.
Во извештајот што беше објавен на 3 август, Џејмс наведе дека сите обвинувања се веродостојни. По извештајот ќе следува постапка за отповикување, поради што и Куомо одлучи да се повлече од функцијата.
– Mислам дека, со оглед на околностите, најдобар начин на кој можам да помогнам сега е ако се тргнам настрана и дозволам владата да се врати на управувањето. Тоа е она што јас и ќе го сторам, бидејќи работам за вас и постапувајќи исправно, ќе постапам исправно кон вас, рече Куомо на денешната прес конференција.
Соочувајќи се со постапка за отповикување, на која призна дека нема да може да се спротистави, Куомо (63) објави дека ќе ја напушти функцијата за 14 дена, и при тоа инсистира дека не направил ништо лошо.
Обраќајќи се на своите три ќерки, Куомо рече „сакам од се срце да знаат дека јас никогаш не сум го направил тоа и никогаш намерно нема да изразам непочитување кон жена или да се однесувам поинаку кон некоја жена отколку што би сакал тие да бидат третирани и тоа е вистината“.
– Вашиот татко направи грешки, се извини и извлече поуки. Тоа е животот, рече гувернерот на Њујорк.