Судењето за настаните од 27 април минатата година во Собранието продолжува денеска во Кривичниот суд со изнесување дополнителни докази од Обвинителството.
Вчера во судот исказ даваше сведокот Методија Илиевски, предложен од одбраната на обвинетиот Богдан Илиевски-Бетмен. Тој рече дека седум години го знаел Богдан и го опиша како воспитан, културен и многу чесен човек.
Методија посочи дека самоиницијативно бил учесник на 50 од протестите на „За заедничка Македонија“, кое го оцени како позитивно движење во кое се говорело за ненасилни дејствија за промени кои ќе бидат подобри за граѓаните.
На 27 април бил на протестите пред Собрание и ништо не укажувало дека ќе биде различно од претходно.
-Во еден момент почна да се зборува дека луѓе влегуваат во Собрание и на тој начин се прекинаа говорите. Ниту претпоставувавме дека ќе се случи тоа што се случи, ниту тоа беше нашата цел, рече Илиевски и додаде дека сите биле шокирани.
За случувањата во Собранието на 27 април 2017 година обвинети се вкупно 33 лица, од кои 31 лице за терористичко загрозување на уставниот поредок на државата и двајца за поттикнување. Претходно поради влошена здравствена состојба на обвинетиот Сашко Марковски постапката за него беше одвоена.
Меѓу обвинетите се повеќе пратеници, вработени во МВР и собраниското обезбедување, уметници. Тие пред Судот кажаа дека го разбираат обвинението, но не се чувствуваат за виновни.
На обвинителната клупа се Љубен Арнаудов, Сашо Василевски, Крсто Мукоски, Љупчо Димовски, Јохан Тарчуловски, Митко Чавков, Митко Пешовски, Душко Лазаров, Горан Ѓошевски-Леви, Оливер Поповски, Оливер Радулов, Мунир Пепиќ, Абдуљфета Алими, Елена Доцевска-Божиновска, Иван Цветановски, Борис Дамовски, Богдан Илиевски-Бетмен, Владо Јовановски, Игор Дурловски, Стефан Младеновски, Михаил Младеновски, Захарие Симовски, Младен Додевски, Јане Ченто, Горанче Ангеловски, Игор Југ, Илија Славески, Влатко Трајков, Вилијам Михајловски, Никола Митревски-Кољо, Александар Василевски-Нинџа и Митре Питроповски.
Русковска најава можна комплетно нова постапка
Јавната обвинителка Вилма Русковска завчера рече дека се прибираат докази за лицата кои беа дополнително споменати на судењето за случувањата во Собранието за 27 април, бидејќи, како што рече, не може да се поведе постапка само врз основа на исказ на еден обвинет. Таа потенцира и дека ако има докази нема да има проширување на постапката, туку може да има комплетно нова.
-Врз база на сведочењата за случувањата на 27 април, за лицата кои беа дополнително споменати се прибираат докази, затоа што знаете дека само врз база на изјава на еден обвинет не може да се води постапка. Не може да се води постапка, ниту врз база на изјава на еден сведок ако нема материјални докази, рече Рускоска одговарајќи на новинарско прашање пред конференцијата за борба против корупцијата.
Законот за амнестија в понеделник во Собрание
Законот за амнестија се очекува во понеделник да биде ставен на гласање, откако утре собраниското Координативно тело ќе ја утврди предлог-верзијата.
Завчера Работната група на Телото за помитување во Собранието, го усогласи предлог законот за амнестија за настаните од 27 априли 2017. Притоа, како што изјави Зеќир Рамчиловиќ оние кои биле организатори и кои учествувале во обид за убиство нема да бидат амнестирани. Не прецизираше дали ќе се бара преквалификација на делото „терористичко загрозување на уставниот поредок“, но го спомена делото „здружување заради непријателска дејност“.
Вчера, адвокатот на еден од обвинетите Митко Чавков, Сашо Дуковски рече дека треба да се почека со заклучоците за тоа кој се ќе биде опфатен со законот, но истакна дека не се согласува со селективна правда.