Македонија ја забележа првата победа во премиерните настапи на Европските ракометни првенства. „Црвено-жолтите“ ја совладаа Словенија со 25:24 во воведното коло од групата Ц во Загреб и во голема мера го расчисти патот кон Вараждин во вториот круг на континенталниот турнир во Хрватска. Дејан Манасков беше најефикасен играч вечерва во „Загрепска арена“ со осум гола, еден повеќе од капитенот Кире Лазаров, Жига Млакар со четири гола го предводеше словенечкиот состав.
Македонија тргна во грч против, традиционално, незгодниот ривал. Се чувствуваше притисок од негативниот биланс во меѓусебните дуели во „змајчеки“, но и силна желба за одмазда за поразите од последните две светски првенства во 2015 година и во 2017 година. Па, првата четвртина од натпреварот донесе големи маки за националниот тим. Организацијата на нападите одеше тешко, реализацијата никако, а резултатски чекор се одржуваше преку ударите од седум метри. Таква беше „црвено-жолтата“ слика до 13 минута во која се дочека и првиот погодок од игра (Стојанче Стоилов).
Од тој момент како да дојде до ослободување на македонските ракометари. Ги надвладеаја импресиите и почнаа да се појавуваат во мечот. Заиграа послободно и полека, но сигурно, воспоставуваа рамнотежа и на теренот и на семафорот пришто пресудна улога имаше потегот на Раул Гонзалез да го замени Борко Ристовски со Никола Митревски меѓу стативите. А, голманот на романска Доброгеа Суд од Констанца возврати на импресивен начин за, можеби, најдобрата своја репрезентативна партија во кариерата. Одбрани девет удари, „фати“ и седмерец за внесување немир кај противничките ракометари. Неговите интервенции беа валоризирани во нападот и со погодокот на Филип Талески се замина со егал на одмор (11:11).
Македонија продолжи фуриозно по враќање од соблекувалната. Се разбуди Манасков кој за првпат во средбата обезбеди водство за репрезентативните колеги. Она што беше Словенија во првото полувреме, „црвено-жолтите“ беа во второто. Набрзина нанижаа неколку погодоци и осигураа чувствителна предност што беше како еден вид на патоказ во која насока ќе оди мечот. Но, драмата, сепак, остана во „Загрепска арена“. Романските арбитри во еден момент досудија три исклучувања за македонски ракометари што беше голем „ветар во грб“ за составот на Веселин Вујовиќ што и се случи. „Змајчеки“ се вратија во живот и до крај придонесоа за резултатска тензија во Загреб.
До крајот се играше гол за гол пришто двете селекции наизменично се менуваа во водство. Факторите срце и глава во финишот, сепак, беа на страна на Лазаров и компанија кои имаа плус еден, но и два нереализиран и напада за ставање на точка на победа што, за среќа, остана неказнето од Словенците.
Во увертира на македонско-словенечкиот судир, бранителот на титулата Германија славеше убедлив триумф над Црна Гора со 32:19.
Утре е ден за одмор во Загреб. Натпреварите во групата Ц продолжуваат во понеделник со дуелите Словенија – Германија (18,15 ч.) и Црна Гора – Македонија (20,30 ч.).
Македонија – Словенија 25:24 (11:11)
Сала: „Загрепска арена“ во Загреб. Гледачи: 12.000. Судии: Константин Дин и Сорин Лорентиу Дину (двајцата од Романија).
Македонија: Ристовски (4 одбрани), Митревски (9 одбрани, 1 седмерец), Манасков 8, М. Велковски, Стоилов 1, К. Лазаров 7, Прибак 1, Јоновски, Талески 1, Миркуловски 2, Н. Маркоски, Кузмановски, Георгиевски 2, Ф. Лазаров 2, Поповски, Пешевски 1. Селектор: Раул Гонзалез.
Седмерци: 5/6. Исклучувања: 12 минути.
Словенија: Скок, Лесјак, Благотиншек 3, Вердинек, Хенигман 1, Маргуч 2, Кавтичник 1, Јанц 3, Цингесар 3, Зарабец 3, Безјак 1, Гребенц, Жабич, Мацковшек 2, Млакар 4, Сухолезник 1. Селектор: Веселин Вујовиќ.
Седмерци: 3/4. Исклучувања: 20 минути.
ЕП во ракомет (м) во Хрватска
Група Ц (Загреб), 1 коло
Германија – Црна Гора 32:19
Македонија – Словенија 25:24
Група Д (Вараждин), 1 коло
Шпанија – Чешка 32:15
Данска – Унгарија 32:25
Утре на ЕП
Група А (Сплит), 2 коло
Србија – Шведска (18,15 ч.)
Исланд – Хрватска (20,30 ч.)
Група Б (Пореч), 2 коло
Австрија – Франција (18,15 ч.)
Норвешка – Белорусија (20,30)