Одложено е денешното рочиште за случајот Тврдина 2 во кое обвинети се Горан Грујевски и уште шест вработени во УБК. Причината е тоа што судот се уште не добил известување од МВР дека Грујевски е во бегство, односно дека е недостапен за органите на прогонот.
Без потврда од МВР, СЈО не може да побара на поранешниот прв човек на Петта управа да му се суди во отсуство.
Наредното рочиште е закажано за 2 октомври кога се очекува четворица сведоци да дадат исказ.
Обвинителката Ленче Ристоска од СЈО, која е застапник на обвинението, во петокот на дебата за употребата на посебни истражни мерки за трети лица пред домашни и странски експерти, рече дека за обвинителството од исклучителна важност е главните обвинети за масовното нелегално прислушување од случаите „Тврдина 2“ и „Таргет“, Горан Грујевски и Никола Бошкоски, да бидат најдени.
Горан Грујевски веќе два ипол месеци е во бегство, а како што вчера истакна министерот Оливер Спасовски тие секојдневно добиваат нови сознанија за можната локација каде се крие.
-Каде е Горан Грујевски треба да ја прашате полицијата. Јас можам да кажам дека чекаме да стигне предлогот кој обвинителот треба да го достави до судот за судење во отсуство и судот да го добие известувањето за недостапноста на обвинетиот. Како негова одбрана, сметаме дека би требало да го застапувам оти бев ангажиран од неговиот син, изјави адвокатот Љупчо Шврговски.
Според бранителот на Грујевски, бегството на неговиот клиент не може негативно да влијае на останатите обвинети во постапката, бидејќи оваа околност е дефинирана со закон.
Избегаа пред одлуката на Врховен
Грујевски и Никола Бошковски, обајцата бивши началници во Петтата управа, од 18 јули не се достапни.
Одлуката за притвор Апелациониот суд во Скопје ја донесе на 18 јули, но тие останаа на слобода чекајќи го изјаснувањето на врховните судии. Оттаму информацијата дека треба да одат во притвор беше позната во јавноста на 26 јули околу 14 часот, а Врховен официјално преку соопштение ја потврди еден час подоцна. Процедурата потребна за решенијата, односно налозите за апсење да пристигнат од судот до МВР траеше околу седум часа, што според познавачите, е повеќе од доволно за засегнатите да се пуштат во бегство.
Биле барани на шест-седум локации за кои МВР се сомневала дека таму може да ги пронајде, но не биле најдени. Исто така, не можеле да ги лоцираат ниту преку мобилните телефони бидејќи наводно ги „заборавиле“ дома.
На четвртиот ден од бегството МВР објави потерници.
Двоен идентитет
Во меѓувреме, беше откриено и дека Грујевски имал двоен идентитет и друг пасош на име Владимир Варелов, негов сограѓанин од Велес кој е вработен во ЕБР.
Спасовски не прецизира кој му го издал вториот пасош на Грујевски и дали е повлечен од употреба.
Прашан за другите евентуални идентитети на Грујевски, освен оној на Владимир Варелов, министерот Спасовски потврди дека вработените во УБК поседуваат различни идентитети, но само кога извршуваат специфични службени обврски. Според него, додека се трага по Грујевски и Бошковски, паралелно се води истрага и за оние лице коишто го помогнале нивното бегство.
Николовски: УБК нема пракса на двоен идентитет
Директорот на УБК Горан Николовски во интервју за Телма рече дека не смее да изнесува повеќе детали за истрагата, бидејќи таа истрага ја води Обвинителството, а Управата работи по налог на обвинителството.
Во врска со неговиот двоен идентитет, Николовски рече дека истрагата ќе покаже како тој добил. Според него, најверојатно зе злоупотребени правилата за заштита на заштитени сведоци.
-Според законската реглатива, тоа е во делот на заштита на заштитените сведоци. Двојни идентитети постојат и тие се регулирани законски. Што се однесува до УБК можам да потврдам дека ние немаме пракса на двоен идентитет, бидејќи нашата работа е внатре на територијата на РМ и ние немаме потреба од двоен идентитет за нашите вработени. Веројатно се злоупотребени правилата за заштта на заштитените ведоци, рече Николовски.
Грујевски и Бошковски се обвинети во случаите „Таргет“ и „Тврдина“ на Специјалното јавно обвинителство кои се однесуваат на злоупотребата на системите за прислушкување на УБК и на уништувањето на опремата. Бошковски е вработен во Управата, а Грујевски беше началник на петтата управа во УБК.