Од денеска, по одржување на конститутивната седница на Собранието, и официјално почнуваат разговори за формирање на новото парламентарно мнозинство и влада. Партиите кои по изборите неформално го опипуваа пулсот на политичката сцена, се очекува во наредниот период да ги интензивираат контактите во насока на обезбедување на минимум 61 пратеник за добивање на мандат од претседателот Стево Пендаровски за составување на владиниот кабинет.
Лидерот на СДСМ, Зоран Заев, со преговори за нова влада, како што најави и по изборите, ќе почне по Илинден. Во интервју за хрватскиот неделник „Национал“ пред десетина дена, тој рече дека СДСМ има убедливо најголем коалициски потенцијал.
„Мандатот за формирање на нова Влада е кај СДСМ и коалицијата „Можеме“. Веднаш по празникот Илинден, ќе влеземе во процес на преговори за идно коалицирање и формирање состав на Влада“, рече тогаш Заев.
Тој најави дека ќе разговараат за коалицирање со сите партии што се подготвени да го прифатат европскиот, демократскиот, слободарскиот, напредниот концепт и патот што Северна Македонија го оди како земја членка на НАТО. За „структурите кои заговараат идеи различни од демократскиот и европскиот концепт“, како што рече Заев, не може да бидат дел од идната владеачка коалиција водена од СДСМ.
Лидерот на ВМРО-ДПМНЕ, Христијан Мицкоски, пак, завчера во обраќањето по повод двата Илиндена од струшко Ташмаруништа, повтори дека „ќе учествува во натпреварот за формирање влада што се игра до последна минута“.
Мицкоски минатата недела рече дека не поддржува широка коалиција и смета оти таквата Влада ќе биде неефикасна, како што се покажало и докажало и со техничката влада. Во таа прилика истакна дека нема ништо конкретно околу преговорите за нова Влада и оти досега се сведува на „мерење на политичките сили“. Тој оцени дека не би се изненадил ако никој не успее да формира влада и не ја исклучува можноста за нови парламентарни избори наесен.
На неговите тврдења за нови избори, премиерот и потпретседател на СДСМ, Оливер Спасовски рече дека Мицкоски секој ден ги менува ставовите и оти на изборите што поминаа има јасен победник, а тоа е СДСМ.
Претседателот Пендаровски минатата недела најави дека мандатот за состав на идната влада ќе го довери на оној кој ќе увери дека обезбедил мнозинство во Собранието. Посочи дека уставната норма е кристално јасна – мандатот го добива кандидатот на партијата или партиите што имаат мнозинство во Собранието и тука претседателот нема буквално никаков маневарски простор.
„Најконкретно, ќе го доделам мандатот на кој било претставник на која било од шесте изборни листи кои освоија пратеници во парламентот, кој ќе ме увери дека има мнозинство од 61 пратеник“, потенцира Пендаровски во минатонеделното интервјуто за „Фокус“.
Пендаровски во Илинденското обраќање од Меморијалниот центар „АСНОМ“ на Пелинце, изрази очекување дека новата влада ќе се формира што е можно побрзо и таа влада, како што рече, ќе нема комоција да избегне тешки прашања во првите 100 дена. Новата Влада, според него, ќе има и друга комплексна задача, особено, како што рече, по изборната кампања во која беа изречени тешки обвинувања и лични дисквалификации што дополнително ги продлабочија поделбите меѓу граѓаните, истакувајќи оти помирувањето ни е потребно повеќе од кога било во историјата.
Според Уставот, претседателот на државата е должен во рок од 10 дена од конституирањето на законодавниот дом, да го довери мандатот за состав на Владата на кандидат на партијата, односно партии што имаат мнозинство во Собранието. Мандатарот, пак, во рок од 20 дена од денот на доверувањето на мандатот, треба да поднесе програма и предлог состав на Владата до Собранието.
На предвремените парламентрани избори што се одржаа на 15 јули, коалицијата „Можеме“ предоведна од СДСМ освои 46 пратеници, коалицијата „За обнова на Македонија“ на ВМРО-ДПМНЕ – 44, ДУИ – 15, коалицијата на Алијанса на Албанците и Алтернатива – 12, Левица – два и ДПА – еден мандат.