Во врска со отстранувањето на споменикот на Андон Јанев Ќосето од пред Врховниот суд во Скопје, општина Центар денеска соопшти дека по детално испитување на фактичката состојба, нивните надлежни служби донеле решение дека се работи за дивоградба.

При увидот на овластениот градежен инспектор на општина Центар, како што се наведува, е констатирано дека спомен обележјето не е поставено на одобрената микро локација и издаденото решение од страна на град Скопје.

Од општината посочуваат дека одлуката за подигање на спомен обележје на Андон Јанев Ќосето ја донел тогашниот Совет на општина Центар на 28.12.2012 година и тука е направено и основното прекршување на законот, бидејќи во член 1 стои дека одлуката се носи заради одбележување на делото и оддавање почит на македонскиот комита и револуционер од илинденскиот период.

Според Законот за меморијални споменици и спомен-обележја, настаните и личностите што се одбележуваат со меморијален споменик треба да се од исклучително значење за развојот на државноста на Република Македонија и за нејзиниот државно-правен континуитет и да се вградени во историскиот развој на земјата. Меморијален споменик може да подига Собранието на Република Македонија, Советот на општините, на градот Скопје и на општините во градот Скопје за одбележување со спомен-обележја на настани и личности што се од локално значење, донесува програма за одбележување на значајни настани и истакнати личности со спомен-обележја.

Решението за поставување на спомен обележјето на Андон Јанев Ќосето е донесено од поранешниот Совет на град Скопје на седница одржана на 14.07.2014 година, информираат од општина Центар.

Споменикот на Андон Ќосето рано утрово е отстранет и однесен во магацините на Металски завод Тито.

На социјалните мрежи се појавија видеа од неговото отстранување со најразлични коментари, од поддршка до осуда, но и прашањата, зошто отстранувањето е извршено ноќе, на истиот начин како што претходната власт и ги поставуваше. Од Град Скопје најавија дека на ова прашање ќе одговори градоначалникот на Скопје Петре Шилегов. Во меѓувреме за порталот сакамдакажам.мк кусо одговориле дека е за да не се загрози безбедноста во сообраќајот.

Споменикот на Андон Ќосето, кој од септември 2014 година се наоѓаше пред судовите е отстранет со налог од градежниот инспекторат на општина Центар по извршениот увид и утврдената фактичка состојба дека немало решение за негово поставување.

За поставувањето на споменикот од страна на работна група во Министерството за култура беа утврдени бројни законски прекршувања.

Споменикот на ликот на Андон Јанев-Ќосето, во историјата познат и како ликвидатор во ВМРО беше поставен ноќата меѓу 6 и 7 септември 2014 година е еден од петте споменици на различни локации и е донација од Здружението за духовно обединување на Сетинци, Попадинци и Крушоради од Лерин.

Како што беше објаснето, во чест на одбележувањето на 23 годишнината од независноста на Република Македонија, со „споменици на македонски великани, посветени на Националната борба за независност на Република Македонија“.

Тој е дело од контроверзниот проект „Скопје 2014“ на Владата на Груевски и е поставен во времето на  градоначалникот Коце Трајановски.

И самото Здружение за духовно обединување на Сетинци-Попадинци и Крушоради од Лерин, познато по големите донации на споменици за Скопје, е обвиткано во контроверзи. НОВА пишуваше за тоа дека донациите на ова анономно здружение отворија сомнежи за потеклото на парите со кои што се правеле овие споменици. А се јавија и легитимни прашања – дали ова здружение е вистински претставник на граѓанскиот сектор или само фронт организација зад која се кријат нарачателите на едни од најконтроверзните споменици – политичката партија ВМРО-ДПМНЕ која во тоа време ја имаше власта.

Во ноември лани, новата влада им ги одзеде привилегиите кои што им ги даде Груевски во, според нив, нетранспарентна процедура.