Партискиот врв на ВМРО ДПМНЕ заедно со пратеничката група до крајот на оваа недела ќе одлучат дали пратениците на опозицијата ќе се вратат во Собранието, по одлуката на Врховниот суд со која повеќе ниту еден пратеник не е во затворски притвор, велат од ВМРО ДПМНЕ за НОВА.
Врховниот суд вчера ја прифати жалбата на пратениците Крсто Мукоски и Сашо Василевски и им го замени затворскиот притвор со куќен. Исто така Врховниот суд ја прифати и жалбата на пратениците Љупчо Димовски и Јохан Тарчуловски кои беа во домашен притвор. Притворот им е укинат и за нив се определени мерки на претпазливост – тие треба еднаш неделно да се јавуваат во Основниот суд.
Со ваквата одлука на судот, пратениците Димовски и Тарчуловски ќе можат да се вратат во Собранието, доколку партијата одлучи да учествува во работата на законодавниот дом.
Во пратеничките клупи се враќа и Жаклина Пешевска. Обвинителството денеска соопшти дека за Пешевска постапката за настаните од 27 ми април е запрена, бидејќи не се обезбедени докази дека сторила кривично дело.
Во куќен притвор е и пратеникот Љубен Арнаудов – тој не поднесе жалба до Врховниот суд за укинување на притворот.
Со ова, велат во ВМРО ДПМНЕ, делумно се исполнува првиот услов за враќање во Собранието. Главните аргументи на ВМРО ДПМНЕ за неучеството во Собранието досега беа дека 12 проценти од нивната пратеничка група се во притвор и не можат комплетно да функционираат во Собранието.
Претседателот на ВМРО ДПМНЕ Христијан Мицковски по средбата со премиерот Заев на почетокот на месецов, рече дека има чувство дека математичките и политичките проблеми ќе бидат надминати.
,,Во моментов, ВМРО ДПМНЕ останува на своите позиции, прашањето е од математичка и политичка природа и ние не можеме да бидеме комплетно активни во Собранието. Се надевам и имам чувство дека многу брзо математичките и политичките проблеми ќе бидат надминати и ВМРО ДПМНЕ ќе може да се врати во Собранието и да биде целосно псоветена на работата во парламентот, рече Мицкоски по средбата со премиерот Заев на почетокот на март.
Другиот услов, велат во ВМРО ДПМНЕ, е политичкиот- односно да се создададе демократски амбиент што ќе значи и вклученост на опозицијата во изготвувањето на реформските закони. Според информации на НОВА, разговорите меѓу претставници на СДСМ и на ВМРО ДПМНЕ се уште не се завршени, но има усогласувања за дел од сетот закони за кои се дебатира како што се: Законот за прислушување и ОТА- Оперативната техничка агенција, Законот за политички партии, Законот за заштита на сведоци.
Во овој пакет на договарања е и новиот состав на Државната изборна комисија. Заев веќе најави дека власта го прифатила предлогот на ВМРО ДПМНЕ, новиот претседател на Изборната комисија да биде на предлог на опозицијата.
Дел од пратениците на ВМРО ДПМНЕ денеска учествуваа во Собранието на јавната расправа за Предлог – измените на Законот за аудио и визуелни медиумски услуги, но како што рече пратеникот Зоран Илиоски ова не значи нивно враќање во парламентот.
ВМРО ДПМНЕ ја напушти работата на Собранието на почетокот на декември, кога беа приведени шест нивни пратеници за насилствата од 27 април. Тие влегоа во собраниската сала на третото читање на Законот за јазици.