За Нова ТВ од Букурешт: Сашко Ѓ. Димовски
Отворено и на победа против Украина, оти Македонија повеќе нема што да загуби по денешниот пораз од Австрија во групата Ц на 16. Европско фудбалско првенство. Капитенот ќе остане забележен како стрелец на првиот гол за националниот тим на континенталните смотри, но жали и за себе, соиграчите, стручниот штаб и навивачите, што премиерата не заврши макар со реми.
– За жал, загубивме од Австрија, но шансите не се загубени. Сега прво да одмориме, а потоа нè чекаат подготовки за дуелот со Украина во четврток. Ќе биде тешко, секако, меѓутоа во него можеме само да добиеме. Ќе играме отворено и на победа, бидејќи немаме што да загубиме, рече капитенот Пандев на прес-конференцијата по натпреварот со Австријците.
Македонските фудбалери согореа во желбата за позитивна промоција на континенталниот турнир. Одиграа помалку во грч со ривал против кој може да се игра и надигрува, па конечниот епилог дојде како логична последица на настаните на терен.
– Ова е наш прв настап на Европските првенства и може да кажам дека имавме добри 80 минути. Австријците се покажаа како физички подобри од нас и имаат подолга клупа. Ги издржавме првите 15-20 минути, имавме неколку контри што требаше подобро да ги искористиме, меѓутоа таков е фудбалот. Несреќно го примивме оној втор гол што, мислам, го реши победникот, додаде Пандев.
Македонија во четврток од 15 часот ќе игра против Украина, чија репрезентација вечерва се соочува со Холандија во Амстердам.