Ирачкиот Парламент го поддржа барањето за напуштање на американските трупи од земјата. Резолуцијата што е окарактеризирана како историска е донесена на попладневната вонредна седница која е закажана по убиството на иранскиот генерал, Касем Сулејмани.
„Со мнозинство на гласови на вонредна седница е поддржано барањето за напуштање на американските воени трупи и на останатите странски сили на Ирак“, пренесува агенцијата „Ројтерс“.
На собраниската седница што е во тек, пренесува агенцијата, присуствува и ирачкиот премиер Абел Абдул Махди кој ја иницира резолуцијата. Во соопштението на Парламентот се наведува дека ирачката Влада е должна да го спроведе барањето. Шиитските пратеници по гласањето извикуваа „Стоп САД“ и „Окупаторе, губи се“.
„И покрај внатрешните и надворешните потешкотии со кои се соочуваме, ова е најдобра одлука за Ирак“, рекол Махди.
Ирачкиот шиитски свештеник, Моктада ал-Садр, изјави дека собраниската резолуција со која се повикува Владата да го прекине присуството на странски сили во земјата е доволна и ги повика локалните и странските групи на обединување во, како што рече, „Легија на меѓународен отпор“.
„Сметам дека ова е слаб и недоволен одговор на американското кршење на ирачкиот суверенитет и регионалната ескалација“, наведе Садр.
Тој притоа повика на раскинување на безбедносниот договор со САД, затворање на американската амбасада во Багдад, протерување на американските трупи на понижувачки начин и на криминализација на комуникацијата со американската Влада.
Ваквата одлука на ирачкиот Парламент доаѓа по убиството на иранскиот генерал Касем Сулејмани кој настрада во воздужен напад на американските сили. Посмртните останки на влијателното воено лице денеска беа пренесени во Иран каде се насобраа голем број на граѓани.