Северна Кореја синоќа лансираше нова интерконтинентална нуклеарна ракета (ИЦБМ), која прелетала 998 километри пред да падне во јапонскиот ексклузивен економски појас.
Северно-корејскиот диктатор Ким Јонг-Ун изјави дека овој последен тест ја става целата американска територија на дофат на ракетите на Пјонгјан, објави КЦНА официјалната агенција на Северна Кореја. Тој додаде дека со овој тест се покажал капацитетот на земјата да лансира ракета “било каде и било кога”.
Агенцијата пишува дека “лидерот гордо изјави дека тестот потврдува дека и територијата на САД е на дофат на ракетите”. Според агенцијата станува збор за подобрена верзија на Хвасонг-14 ИЦБМ која минува 998 км во 47 минути на надморска височина 3.724 метри.
Портпаролот на Пентагон Џеф Дејвис изјави дека ракета била лансирана од локацијата Мупјонг ни, фабрика за оружје на северот на Северна Кореја, и дека паднала на 167 километри од јапонскиот остров Хокаидо.
„Ова лансирање беше очекувано. Нашата определба со нашите сојузници, вклучувајќи ги Република Кореја и Јапонија, пред овие закани останува цврста. Спремни се да се браниме самите и нашите сојузници од какви било напади или провокации“, изјави Дејвис.
Американскиот претседател изјави дека овој тест е “опасна акција која уште повеќе ќе ја изолира Северна Кореја”.
“Заканувајќи му се на светот со своето оружје и тестовите уште повеќе ќе ја изолира Северна Кореја, ќе ја ослабне нејзината економија и ќе го осиромаши нејзиното население”, вели Трамп.
Тој додава дека “САД ќе преземат неопходни мерки за да се осигура безбедноста на националната териториј и за заштита на нашите сојузници во регионот”.
Американскиот државен секретар Рекс Тилерсон ги обвини Кина и Русија кои носат, рече тој, “специјална и уникатна одговорност” во влошувањето на заканата од Северна Кореја.
“Ова е фларгрантно кршење на повеќе резолуции на Советот за безбедност на Обединетите Нации”, вели Тилерсон.
Кина е единствениот сојузник на Пјонгјанг а Пекинг, како и секогаш, денес побара воздржување од сите вовлечени страни во оваа криза.
Рускиот претседател Путин бара од меѓународната заедница “да не ја губи ладнокрвноста” пред покажувањето на моќ на северно-корејскиот режим.
Првиот тест со ваква ракета беше направен на 4 јули.