Министерството за економија во рок од седум дена треба да изготви информација за исполнетост на условите за раскинување на Договорот за концесија за експлоатација на минерална суровина, бакар, злато и сребро, на локалитетот „Казандол“, кој ги опфаќа општините Валандово, Богданци и Дојран и за одземање на Дозволата за експлоатација на минерални суровини доделена на  20 јули 2015 година.

Вакво задолжение добило Министерството по вчерашната седница на Владата, на која била разгледана и усвоена Информација за степен на изграденост на рударскиот комплекс „Казандол“.

-КАЗАНДОЛ СЕ ЗАТВАРА !
Празник за Југоистокот и цела Македонија. Празник за иднината на нашите деца и внуци.
ДА ЖИВЕЕ МАКЕДОНИЈА!!!, напишаа на својот профил на Фејсбук од граѓанското здружение Спас за Гевгелија, по вчерашната владина одлука.

Жителите на повеќе градови во југоистокот со месеци протестираа и предупредуваа на опасноста од отворањето на овие како што ги нарекуваат „рудници на смртта“. Се одржаа и референдуми во гевгелија, Богданци, Валандово, Дојран…, а премиерот Заев, и за време на изборната кампања, но и потоа изјавуваше дека „Македонија не сака да биде земја без рудници, но дека здравјето на граѓаните е на прво место“.

Оттогаш, активистите, повеќепати објавуваа фотографии на социјалните мрежи на кои, како што тврдеа, се гледа дека забрзано се работи на изградба на рудникот Казандол и бараа од Владата да го запре тоа, предупредувајќи дека се загадува почвата.

Државниот инспекторат за животна средина (ДИЖС) тогаш соопшти дека на 3 октомври извршил вонреден надзор во рударскиот комплекс Казандол во Валандово, но притоа не е регистрирано надминување на загадувањето според она што го пропишува законот, освен во почвата, но за тоа, како што велат од Инспекторатот, се уште не постојат закон и правилници.

Министерот за економија пак, одговарајќи на новинарски прашања за концесијата на Казандол повеќепати говореше дека таа е завршена, но одбиваше да го објави договорот во јавност.

Концесионер на рудникот за бакар и бакарни производи во Казандол е компанијата Сардич МЦ. Основач на „Сардич МЦ“ е акционерското друштво „Коппер Инвестмент“. За оваа инвестиција Груевски зборува уште на почетокот на 2013 година. Инвестицијата прво ја нарекуваше „англиска“, продолжи со „англиско-украинска“ за конечно да стаса до само „украинска“. Во реалноста – со удели на македонските големостопанственици и политичари од двете држави.

Шест нешта за рудникот во Казандол за кои сите мора да знаеме