По големиот триумф во Рејкјавик, реми во Скопје. Македонија и Исланд одиграа 24:24 (полувреме 10:11) во квалификацискиот реванш за пласман на ракометното Европско првенство во 2020 година. Исходот од салата „Борис Трајковски“ оди во прилог на двете селекции во потерата на завршниот турнир во Норвешка, Австрија и Шведска.
„Црвено-жолтите“ остануваат лидери на табелата со пет бода колку што имаат и Исланѓаните пред последните два меча во јуни против Турција, односно, Грција во кои и едните и другите важат за апсолутни фаворити.
Кире Лазаров и Инги Магнусон постигнаа по осум гола и завршија како најефикасни во двете репрезентации. Пет погодоци за гостите реализира Елвар Јонсон, меѓу нив и израмнувачкиот на четири секунди до крајот. По четири за македонскиот национален тим додадоа Дејан Манасков и Филип Талески.
Националниот тим во претпоследното коло, на 12 јуни, го очекува гостување на селекцијата на Турција во Ескишехир, а четири дена подоцна во Скопје (сала „Борис Трајковски“) и дуел со јужниот сосед, Грција.
Квалификации за ЕП 2020
Трета група, 4 коло
Македонија – Исланд 24:24
Турција – Грција 26:23
Табела: Македонија 5, Исланд 5, Турција 4, Грција 2.