Пехарот во ракометната Лига на шампиони и деветта година во низа ќе добие различен сопственик. Вардар одигра под препознатливото ниво кога беше најпотребно и загуби од Монпелје во полуфиналето со 27:28 (полувреме: 11:14). Лука Циндриќ и Вуко Борозан беа најефикасни во вардаровиот табор и постигнаа по шест погодоци колку и Мелвин Ричардсон за победничката екипа во која најмногу (осум) реализира Валентин Порт.
Раул Гонзалез беше во право за предупредувањата во најава дека играчите на Монпелје имаат фантастично брза транзиција, молскавично казнуваат од брз центар и одлично се снаоѓаат во ситуација „еден на еден“. „Црвено-црните“ го почувствуваа тоа во „Ланксес арена“, но не успеаја да се справат со тестот иако ривалот не изненади со ништо.
Вардаровиот напад беше на ниво на полуфинале со 27 постигнати голови, но одбраната прими еден повеќе и токму во тој сегмент лежи причината за конечниот исход да биде каков што е. Овојпат затаија и голманите кои заедно впишаа само четири одбрани од кои три зад името на Страхиња Милиќ, а дополнителен проблем за сега веќе поранешниот европски првак беше повредата на Арпад Штербик во првото полувреме.
Нант во првото полуфинале го совлада фаворизираниот ПСЖ со 32:28 (полувреме 17:14) и во дебитантското учество на Фајналфор турнирите ќе игра за титула во Лигата на шампиони. Решавачки фактор во историскиот меч на тимот од францускиот запад беше капитенот на македонската репрезентација беше Кире Лазаров. Постигна осум гола, најдобар стрелец кај „светците“ беше Недим Ремили со 6.
Утре попладне (15.15 ч.) „црвено-црните“ ќе играат против ПСЖ за бронзениот медал, од 18 часот е големото финале меѓу Монпелје и Нант.
Лига на шампиони – Келн 2018
Полуфинале
Вардар – Монпелје 27:28 (11:14)
Нант – ПСЖ 32:28 (17:14)
Недела
За трето место: Вардар – ПСЖ (15.15 ч.)
Финале: Монпелје – Нант (18 ч.)