Техничкиот комитет на експерти за справување со пандемијата во Албанија, денеска одлучи да продолжат анти-ковид мерките, меѓу кои и т.н. „полициски час и упати апел до граѓаните на нивно почитување и што поитна имунизација.

Претседателката на комитетот и заменик министерка за здравство Мира Ракацоли, на прес-конференција, изјави дека постојните мерки ќе останат во сила, притоа повикувајќи ги граѓаните да ги почитуваат.

Бројот на заразени е значително зголемен, а причина е присуството на делта варијантата. Бројот на заразени, а невакцинирани лица е 32 пати поголем од вакцинираните. Хоспитализирани со тешки форми се претежно невакцинирани. Ситуацијата може да се контролира со почитување на мерките и што помасовен одзив за вакцинација, изјави Ракацоли.

Посочи дека „полицискиот час“ и понатаму ќе трае од полноќ до 6 часот наутро, музика во угостителските објекти ќе може да има до 23 часот, останува обврска за носење маската во затворени простории и каде има групирања. Останува дозволата за собири на отворено до 50 луѓе, за спортски активности, за театарски претстави и културни настани со пополнетост на капацитетите до 30 отсто.

И директорката на Институтот за јавно здравје, Албана Фицо, како член на Комитетот, изјави дека „мерките не се сменети, туку треба да се спроведат, како што се употреба на маска, одржување на дистанца и хигиена“.

Неделниот просек на нови случаи се искачи на 482 случаја од 291 пред една недела. Вкупниот број на активни случаи во земјата се зголеми од 5.573 на 5.792, што доведе до зголемување на инциденцата во изминатите две недели за околу пет пати. Во однос на позитивноста на примерок, таа останува на 7,8 отсто. Стапката на смртност е 1,8 отсто. Кај возрасната група на лица на возраст од 35 до 64 години има значително зголемување на бројот на нови случаи. Саранда, Химара, Голема Малесија, Скадар, Тирана и Валона се општините со највисока инциденца, рече Фицо.

Според професор Димитар Краја, член на Комитетот, моментно болнички се третираат 90 ковид пациенти во Инфективната клиника во Тирана, од кои 60 отсто се мажи, 55 отсто се постари лица, 15 отсто млади, додека 30 отсто од хоспитализираните се во сериозна здравствена состојба.