Повеќе стотици демонстранти на опозицијата синоќа во Варшава го блокираа Парламентот и ги затворија сите излези од зградата во која се наоѓаа премиерката Беата Шидло и шефот на партијата Право и правда Јарослав Качински како и повеќе од 200 пратеници на мнозинството.
Неколкумина од нив се обидоа да го напуштат Парламентот но нивните авотмобили беа сопрени од страна на толпата демонстранти. Полиција се обиде да евакуира неколку демонстранти но брзо се откажа од таа намера па блокадата продолжи во ноќта.
Демонстрантите бараа слободни медиуми, почитување на Уставот и скандираа “нема да излезете до Божиќ” веејќи полски знамиња.
По полноќ на демонстрантите им се придружија и повеќе пратеници од Граѓанската платформа.
Ова е прв пат во Полска да се случи ваков конфликт помеѓу власта и опозицијата. Пред Парламентот манифестираа повеќе стотини луѓе на апел на движењето за одбрана на демократијата.
Демонстрантите протестираа против одлуката со која се лимитира пристапот на медиумите до пратениците и поради усвојувањето на буџетот за 2017 година во услови кои опозицијата ги оцени како незаконски.
Пратениците беа повикани да гласаат во една друга сала на зградата бидејќи главната сала беше окупирана од триесетина пратеници на опозицијата кои протестираа против новите правила за новинарите.
Според партијата на власт, гласањето за буџетот и законот со кој се намалуваат пензиите на поранешните полицајци на комунистичката полиција, се одржале според сите правила. Но, опозицијата тврдеше дека тоа било незаконски и велеше дека некои пратеници не можеле да влезат во салата каде се гласало поради хаосот кој владееше во Парламентот.
За пратениците на мнозинството, протестот се случил поради гласањето на законот за поранешните полицајци на комунистичкиот режим.