Тотенхем и Ајакс во меѓусебен судир на европски фудбалски мегдан по пауза од 38 година. Во 1981 година се пресметаа во тогашниот Куп на победници на купови или скратено КПК, а вечерва ќе се судрат во првото полуфинале во Лигата на шампиони. Натпреварот во Лондон е со почеток во 21 часот.
Покетино: Хендикепирани сме и заморени, имаме суспендирани и повредени
Двата тима во мечот влегуваат со различно расположение. Менаџерот на „спарси“, Маурисио Покетино не може да смета на суспендираниот Сон и на повредениот Кејн, но се пожали и на заморот меѓу неговите играчи. За истакнување на нерамноправната положба ги искористи обврските што Тотенхем ги имаше во Премиерлигата викендот и мечот со Вест Хем за разлика од Холанѓаните кои го одложија целото коло за што подобри подготовки на Ајакс.
Тен Хаг: Хендкепирани? – А колку пари имате?
Неговиот колега, пак, на спротивната страна, Ерик Тен Хаг не сака ниту да слушне за поплаките на Аргентинецот.
„За настапите во Холандија, ние добиваме 10 милиони евра. Тие од Премиерлигата добиваат многу повеќе милиони. Дали тоа не е нефер кон нас. Секој има свои проблеми, сите работиме во поинакви околности и на секој тим му преостанува да се избори во нив колку што може подобро. Тоа го правиме ние“, возврати тренерот на Ајакс.
Холандскиот полуфиналист во ЛШ има млада екипа која го сврте на себе сето внимание со игрите и резултатите оваа сезона, особено по елиминациите на Реал Мадрид и на Јувентус во осминафиналето, односно, четврт-финалето. Се очекува дека добар дел од првотимците ќе направат трансфери уште во летниот преоден рок. На мета на големите европски клубови се Матијс де Лигт, Нерес, Зијеш, Френки де Јонг меѓутоа Тен Хаг истакна дека разлика направиле повратниците од Премиерлигата – Душан Тадиќ од Саутемптон и Дели Блинд од Манчестер јунајтед.
„Знаевме колку се важни знаењето и искуството што тие го носат. Пред нив имавме добар, но истовремено и млад и неискусен тим“, коментира Тен Хаг.
Втората полуфинална двојка ја сочинуваат Барселона и Ливерпул. Првиот меч е утревечер на „Камп Ноу“ од 21 часот. Реваншите се наредната недела, големото финале е на први јуни на стадионот „Ванда Метрополитано“ во Мадрид.