Недоволна координација и грешка која не треба да се повтори. Со овие зборови пратениците се правдаат затоа што на вчерашната седница на Собранието, не ги изгласаа препораките на народниот правобранител за подобрување на состојбата со човековите права и слободи во Македонија.
За подобрување на човековите права и слободи не гласале пратеници и од власта и од опозицијата, како Али Ахмети, Амди Бајрам, Павле Богоевски, Томислав Тунтев, Диме Велковски, Артан Груби, Зоран Илиески, Ивана Tуфегџиќ, Стево Пендаровски и други.
Дел од овие пратеници не присуствувале на седницата и велат дека имаат оправдување за тоа.
Против препораките гласале Мицевски Никола, Митовска Слаѓана, Ѓорѓиевски Зоран, додека пратеникот Владимир Ѓорчев гласал воздржан. НОВА ТВ денеска и телефонски и во канцеларијата на Собранието го побара Ѓорчев за објаснување, зошто гласал воздржан, но тој не одговори на нашите повици, ниту пак беше присутен во Собранието.
Пртениците ветуваат дека ова нема да се повтори и дека денеска ќе ја поправат направената грешка.
Народниот правобранител, Иџет Мемети, на денешната прес-конференција не ја криеше разочараноста од народните избраници.
Тој најави дека ќе побара Владата на седница да ги изгласа овие мерки.
Во препораките на правобранителот се бара да се избришат гумените куршуми и електричниот парализатор како средства за присилба што ги користи полицијата.
Од областа на судството, Мемети бараа на Управниот суд да му се помогне да одлучува полесно и побрзо.
Народниот правобранител, меѓу другото, исто така побарал извршителите да не смеат да блокираат трансакциски сметки во банка, додека за затворите бара да се подобрат условите, да се подобри безбедноста во затворите и да се подобрат здравствените услови.