Кон средината на идната недела, по велигденските празници, грчкиот министер за надворешни работи, Никос Коѕијас повторно ќе допатува во Скопје, каде што ќе се сретне со министерот Никола Димитров. Датумот се уште не е утврден прецизно, но посетата е веќе договорена, објави Независен весник, повикувајќи се на дипломатски извори.
Од македонското МНР засега не потврдуваат ваква информација.
И грчките медиуми денеска објавуваат дека шефовите на македонската и на грчката дипломатија на 12 април ќе имаат нова средба повторно во Скопје.
Како што пренесува МИА, грчките медиуми коментираат дека следната седмица ќе биде клучна за преговорите, а во тие рамки ја вклучуваат и новата средба на двајцата министри.
-На 12-ти месецов се очекува да се сретнат во Скопје двајцата министри, според сигурни извори. Да потсетиме дека господинот Коѕијас рече дека на следната средба веројатно и да се направи големиот чекор, објави грчката ТВ Алфа.
Во меѓувреме, од вчера, министрите за надворешни работи на Македонија и Грција започнаа со брифинзите на највисоките државни претставници и партиските лидери за исходот од состанокот, што во петокот во Виена го имаа со медијаторот на Обединетите нации Метју Нимиц.
– Ги знам сите детали и драго ми е што можам да потврдам дека има позитивен исчекор во разговорите. Ако некој ме праша дали сум повеќе или помалку оптимист и позитивен, јас сум повеќе позитивен и поголем оптимист по оваа средба што Димитров ја имаше со Коѕијас во Виена под раководство на посредникот Метју Нимиц, изјави премиерот Зоран Заев по средбата со министерот Димитров.
Заев најави дека лидерска средба на оваа тема е можно да се одржи по велигденските празници. Заев одговараше на новинарско прашање во врска со најавата на Димитров минатата недела дека по преговорите за името во Виена ќе се одржи состанок на државниот врв и лидерите на најголемите партии.
Од ВМРО-ДПМНЕ, пак, вчера соопштија дека не добиле официјална покана за средба на лидерот на партијата Христијан Мицкоски со Димитров. Потврда за средба нема ниту од Кабинетот на претседателот Ѓорге Иванов.
На 27 јануари годинава во Клубот на пратениците се одржа досега единствениот координативен состанок на државно-политичкиот врв во врска со разговорите за името на кој присуствуваа претседателот Ѓорге Иванов, премиерот Зоран Заев, лидерот на ДУИ Али Ахмети и претседателот на ВМРО-ДПМНЕ Христијан Мицкоски.
Мицотакис не сака да разговара со Коѕијас, бара средба со Ципрас
Коѕијас во Грција исто така ги брифираше лидерите на политичките партии за разговорите во Виена.
Речиси два часа траеше средбата на генералниот секретар на Комунистичката партија на Грција Димитрис Куцубас со шефот на грчката дипломатија Коѕијас, со кој всушност почна серијата средби.
За денеска се предвидени разговори со лидерката на ПАСОК и Движење за промена, Фофи Генимата и претседателот на Сојуз на централисти Василис Левендис.
Најголемата опозициска партија Нова Демократија ќе остане последна за информирање, откако лидерот Кирјакос Мицотакис одби да го прими Коѕијас и побара да биде информиран лично од премиерот, а шефот на грчката дипломатија ќе се сретне со одговорниот за надворешна политика во партијата, Јоргос Кумуцакос.
Кумуцакос, пак, вчера во интервју за грчкиот весник „Елефтерос типос“ изјави дека во разговорите само се потврдува ќор-сокакот.
– Од она што можеме да го знаеме, се покажува дека има сериозна компликација. Во суштина, посетата на Коѕијас на соседната земја, започна и заврши со слетувањето на аеродромот во Скопје. Покрај тоа, лошата и површна јавна изјава на премиерот од Брисел за конкретно име, го „заклучи“ ќор-сокакот што се покажа за време на посетата на Коѕијас, вели Кумуцакос.
Преговорите за името и последната средба во Виена, грчко-турските односи, како и економијата, се очекува да бидат темите на денешната владина седница со која ќе претседава грчкиот премиер Алекис Ципрас.
Како што објави МИА, состанокот е закажан за 11 часот по локално време, а во кусото соопштение од премиерскиот кабинет, не се споменати темите кои што ќе се најдат на масата пред министрите од СИРИЗА и Независни Грци.