Филипинскиот претседател Родриго Дутерте се закани со затворска казна за граѓаните кои одбиваат да се вакцинираат против ковид-19 додека неговата земја води голема битка со заразата и има преку 1,3 милиони инфицирани лица и над 23.000 смртни случаи.
– Или ќе се вакцинирате или ќе одите во затвор. Вие одлучувате, им рече претседателот Дутерте на граѓаните во телевизиско обраќање по извештајот за низок одговор на вакцинациите во главниот град Манила.
Заклучно со 20 јуни, целосно вакцинирани се 2,1 милион Филипинци, што е многу мал напредок со оглед на тоа што целта на владата е да вакцинира до 70 милиони луѓе до крајот на годината, во земја со 110 милиони жители.
– Не ме сфаќајте погрешно, но земјата е во криза, јас сум револтиран од граѓаните кои не ја почитуваат својата влада, рече Дутерте.