Турскиот суд вчера осуди 14 новинари вработени во весникот „Џумхуриет“ на затворски казни под обвинение за тероризам, додека тројца се ослободени.
– Новинарите се осудени од 2,5 до 7,5 години затвор. Уште едно лице, кое не беше вработено во „Џумхуриет“, обвинето е за активности на Твитер и е осудено на 10 години затвор, истакна адвокатот Озден Оздемир.
Новинарите од „Џумхуриет“ се обвинети за поддршка на мрежата на Фетулах Ѓулен, муслимански свештеник, кој за Анкара е инспиратор на неуспешниот обид за воен удар во Турција во 2016 година.
Осудените ги негираат обвинувањата.
– Ова не е пресуда по законот. Ова е политички случај, посочи Оздемир.
Турскиот суд во јули лани одлучи условно да ослободи седум новинари на весникот Џумхуриет, но ги задржа во притвор главните новинари за судскиот процес.
Но во притвор останаа четворица новинари: колумнистот Кадри Гирсел, истражувачкиот новинар Ахмет Сика, главниот и одговорен уредник Мурат Сабунчуа и сопственикот на Џумхуриет Акин Аталај.
Групата од 17 новинари и соработници на весникот е обвинета за помагање на терористички организации.
Судот во Истанбул во февруари годинава осуди шест новинари на доживотни казни затвор обвинети за вмешаност во обидот за државен удар во 2016 година.
Меѓу осудените денеска се поранешниот уредник на весникот „Тараф“ Ахмет Алтан, неговиот брат, новинарот и академик Мехмет Алтан и истакнатиот новинар Назли Иличак.
Меѓународната заедница смета дека Турција ја загрозува слободата на медиумите.